Սիրիացի գրոհայինները խախտել են հրադադարի ռեժիմը

Սիրիայում հակակառավարական խմբավորումները ուրբաթ օրը, չնայած կնքված հրադադարին, հարձակվել են երկրի հյուսիս-արևմուտքում գտնվող զինված ուժերի բազայի վրա. հաղորդում է Agence France-Press-ը՝ հղում կատարելով «Մարդու իրավունքների պաշտպանության մոնիթորինգի սիրիական կենտրոն»-ի տարածած հայտարարությանը (OSGH):

Ինչպես հայտնում է OSGH-ի ղեկավար Աբդել Ռահմանը, «դաժան մարտերը սկսվել են 10.30-ի սահմաններում Վադի Դեյֆ ռազմական բազայի շրջանում»: Ի պատասխան գրոհայինների հարձակման՝ սիրիական կառավարական ուժերը հարված են հասցրել բազայի հարևանությամբ գտնվող գյուղերից մեկին, որը գտնվում էր Դամասկոսը Հալեպի հետ կապող ռազմավարական մայրուղու վրա: Ռահիմի խոսքերով՝ բախումներին այդ շրջանում բուռն մասնակցություն են ցուցաբերում «Ալ Քաիդա»-ի և ծայրահեղական «Դհեբհաթ ան Նուսրա»-ի գրոհայինները:

Սիրիական զինված ուժերի հրամանատարությունը հինգշաբթի օրը հայտարարել էր Զոհաբերության տոնի կապակցությամբ 3-օրյա զինադադարի ռեժիմի հաստատման մասին: Ընդ որում, սիրիական զինվորական հրամանատարությունն իրեն իրավունք էր թողել խաղաղ բնակչության և կառավարական զորքերի նկատմամբ ահաբեկչական հարձակման դեպքում պատասխան կրակ բաց թողնել հակառակորդի ուղղությամբ:

Ավելի վաղ «Ալ Քաիդա»-ի հետ կապված «Դհեբհաթ ան Նուսրա» խմբավորումը մերժել էր ռազմական գործողությունները դադարեցնելու մասին առաջարկը՝ հայտարարելով, որ չի վստահում Սիրիայի կառավարությանը:

Հիշեցնենք, որ Զոհաբերության տոնի (Աիդ ալ Ադհա կամ Կուրբան Բայրամ) ընթացքում հրադադար հայտարարելն առաջարկել էր ՄԱԿ-ի և Արաբական պետությունների լիգայի Սիրիայի հարցերով հատուկ բանագնաց Լախդար Բրահիմին:

Սիրիական պետական հեռուստաընկերությունը հայտնել է, որ բանակը կդադարեցնի ռազմական գործողությունները ուրբաթ օրն առավոտյան ժամը 5:00-ից մինչև երկուշաբթի օրը, սակայն կառավարական բանակը իրավունք ունի հարձակման դեպքում պատասխան տալ ապստամբներին: