Դուք նարդի կամ բլոտ եք խաղում, որտեղ կոնի վրա մենք ենք

Աստղագետ Ալինա Դերձյանը facebook սոցցանցի իր էջում գրել է.

«Ես բոյկոտում եմ! Բոյկոտում եմ կեղտոտ քաղաքականությունը, բոյկոտում եմ միմյանց վրա ցեխ շպրտելը, բոյկոտում եմ իրար ոտքի տակ փորելը, բոյկոտում եմ իրար պիտակավորելը: Հերիք է, հերիք է մարդկանց դարձնեք թնդանոթի միս: Երկու կողմերին եմ ասում՝ և´ իշխանության, և´ ընդդիմության ներկայացուցիչներին: Բավական է մեզ զբաղեցնեք տարատեսակ լատեքսային արտադրանքների գործունեության քննարկումներով, մանավանդ եթե հստակ գիտեք, որ դա ոչինչ չի փոխելու: Ինչո՞ւ եք լծվել մարդկանց հիմարացնելու «սրբազան» գործին: Պարոնայք ընդդիմադիրներ, կարծում եք ինչ-որ մեկին «իզդելիե նոմեր դվա» անվանելով հարց լուծեցի՞ք, պարոնայք իշխանավոր-իշխանատենչներ, կարծում եք ընդդիմադիրներին մուտիլովկա անելու, անհարկի փաստարկներ բերելու մեջ մեղադրեցիք ու այն ամոթից գետնի տա՞կ է անցնելու: Ո´չ, ցավոք սրտի ո´չ: Դուք, ամեն մեկդ ձեր նիշայում հարմար տեղավորված՝ շախմատ, տո չէ, ի՞նչ եմ ասում, լավագույն դեպքում նարդի, կամ բլոտ եք խաղում, որտեղ կոնի վրա մենք ենք: Բավական է, հոգնեցրիք: Ընդդիմադիրներն իշխանությանը մեղադրում են, բայց առայժմ ոչ մի իրատեսական քայլ չեն անում, որ աչքներս տեսնի: Մյուս կողմից՝ իշխանությունը բացի ինքնապաշտպանական ճիգերից ուրիշ ոչինչ չի ձեռնարկում: Կհարցնեք լավ, բա ի՞նչ անենք, ոչինչ դուր չի գալիս: Պատասխան չունեմ, քանի որ քաղաքականությունը ձեր գործն է պարոնայք: Երեխան չպիտի ծնողին խորհուրդ տա, թե նա որտեղ և ինչպես աշխատի ընտանիքը պահելու գումար վաստակելու համար, նա կարող է միայն իր պահանջները ներկայացնել, եթե ծնողը խուլ ու կույր է ձևանում: Ես ընդամենը քաղաքացի եմ, ով իր երկիրը լքել չի կարող, և ՉԻ ուզում: Բայց ես նաև մարդ եմ, և ուզում եմ եթե ոչ ձեր «կայֆերով», ապա գոնե մարդավայել ապրել: Որ վաղը չմտածեմ, թե դեղի փող որտեղից հայթայթեմ, տարիքն առած ծնողներիս բուժելու համար ոնց փողեր ճարեմ, կամ ինչպես վճարեմ կոմունալ վարձերը: Հոգնեցի ձեր դատարկ, անիմաստ հակամարտության մեջ բռնցքամարտի տանձիկ լինելու դերից: Բավական է!!!

Իհարկե հեծանիվ չհնարեցի, բայց հիշելով մկան ու ջրաղացի մասին ասույթը, որոշեցի ես էլ իմն ասեմ: Բոլորիդ սիրում եմ, իմն եք, լավ թե վատ, բայց իմն եք: Ոչ մի ամերիկացի կամ եվրոպացի ինձ համար ձեզնից լավը չի: Ուղղակի ցավում եմ, որ ԴՈՒՔ ՉԵՔ ՀԱՍԿԱՆՈՒՄ, ՈՐ ԱԽՐ ԵՍ ԷԼ ՁԵՐՆ ԵՄ...»