Ոստիկանությանն ու դատախազությանը մեղադրում է կաշառակերության մեջ. այդ բոլորը նրա դեմ է գնալու (տեսանյութ)

Այսօր «Չենք լռելու» երիտասարդական նախաձեռնությունը հայտարարություն էր տարածել այն մասին, որ իրենց է դիմել Երևանի բնակիչ Կարինե Ավետյանը՝ պատմելով իր և իր երեխաների հետ պատահած դեպքի մասին: Ըստ Կարինեի՝ իր մեծահարուստ ամուսինը տարիներ շարունակ բռնությունների է ենթարկել իր ընտանիքի անդամներին, իսկ նրանց ընդվզումից հետո՝ հանել նրանց տնից՝ կաշառելով օրինապահ մարմիններին և դատարանին:

Արդարադատությունը վերականգնելու համար Կարինեն լրատվամիջոցներով դիմում էր Սերժ Սարգսյանին, Աղվան Հովսեփյանին և Վովա Գասպարյանին։

Կարինեն իր խոսքում նշել էր, որ Դատախազության բոլոր աշխատակիցները, համաձայնության գալով իր նախկին ամուսնու հետ, կարողանում են վաճառել համատեղ գույք հանդիսացող բնակարանը։

Նշենք նաև, որ Կարինեի ամուսինն այս պահին գտնվում է Ռուսաստանի Դաշնությունում։ Այդ իսկ պատճառով Lurer.com-ը կապ հաստատեց Կարինեի ամուսնու քրոջ որդու հետ՝ պարզելու՝ իրականում որտեղ է թաքնված շան գլուխը։ Վերջինս մեզ հետ զրույցում հերքեց Կարինեի այն հայտարարությունները, թե մեծահարուստ ամուսինը կաշառել է դատարանին։ 

«Ոստիկանությանը, դատախազությանը փաստացի մեղադրում է կաշառակերության մեջ, չէ որ այդ բոլորը նրա դեմ է գնալու, քանի որ ինքն այդ ամենը չի կարող ապացուցել։ Դատարանը կաշառված չի եղել։ Կարինեն եղել է իմ քեռու երկրորդ կինը, իսկ նրա նշած տունը քեռիս գնել էր նախքան իր հետ ամուսնանալը, ոչ թե համատեղ կյանքի ընթացքում։ Այդ տունը պատկանում է քեռուս առաջին կնոջ երեխաներին, իսկ Կարինեն պարզապես գրանցված է եղել, այնուհետև խնդիրներ են առաջացել և քեռիս դատարանով նրա հետ ամուսնալուծվելուց հետո մեկնել է Ռուսաստան»,-պարզաբանում է Գրիգոր Ալիխանյանը։

Առաջարկում ենք դիտել «Չենք լռելու»-ի պատրաստած տեսանյութը.