Երգիչ Հայկոն և «Վիտամին»-ի Արմուշն իրենց զոքանչներին շա՜տ են սիրում

Հոկտեմբերի 26-ն աշխարհում նշվում է որպես զոքանչների միջազգային օր:

Արդյո՞ք ողջ աշխարհում, ինչպես Հայաստանում, զոքանչներին միանգամից ասոցացնում են փեսաների հետ, ճշտված չէ, սակայն այն, որ մեզ մոտ շատ անեկդոտներ ու խոսակցություններ են շրջանառվում այս երկու կարգավիճակների՝ միմյանց հանդեպ տածած ոչ այնքան սիրալիր վերաբերմունքի մասին, բոլորս գիտենք:

Ինչ հարաբերությունների մեջ են իրենց զոքանչների հետ մեր ճանաչված արտիստներից երգիչ, կոմպոզիտոր Հայկոն և «Վիտամին» ակումբից Արմուշը, ովքեր արդեն մի քանի տարի է, ինչ պատվով կրում են «փեսա»-ի կարգավիճակը, lurer.com-ը պարզեց հենց նրանցից:

Մեզ հետաքրքրեց, թե ինչպես է կայացել նրանց ծանոթությունն իրենց ապագա զոքանչների հետ, և արդյոք նրանք արդարացնում են իրենց կարգավիճակը:

Ինչպես պարզվեց, Հայկոն, մինչ որպես Անահիտի փեսացու ներկայանալը, արդեն առիթ ունեցել էր հանդիպելու ապագա զոքանչի հետ։ «Անկեղծ ասած մինչ պաշտոնապես մեր՝ իմ ու Անահիտի միասին լինելու մասին հայտնելը, փոքր-ինչ հեռավորություն էինք պահպանում և ավելի պաշտոնական հարաբերություններ ունեինք: Իսկ հիմա առանց թաքցնելու պիտի խոստովանեմ, որ ես իմ զոքանչին անչափ շատ եմ սիրում, ու փեսա-զոքանչ հարաբերությունների մասին շրջանառվող խոսակցություններն ինձ համար շատ տարօրինակ են: Նույնիսկ զարմանում եմ, երբ մարդիկ իրենց զոքանչներին վատ են վերաբերվում։ Իմ բախտը բերել է, իմ զոքանչը շատ լավն է: Թող որ բոլորի զոքանչներն էլ իմ զոքանչի նման լինեն»,- անկեղծացավ Հայկոն:

Իսկ ինչ վերաբերում է Անահիտի մայրիկին նվերներ նվիրելուն, երգիչը խոստովանեց, որ ժամանակի պատճառով շատ անգամ կնոջը՝ երգչուհի Անահիտին է խնդրում, որպեսզի այդ պատասխանատու հարցում իրեն օգնի. «Զբաղվածության պատճառով ես չեմ հասցնում բավարար ուշադրություն հատկացնեմ իմ հարազատներին, այդ թվում՝ զոքանչիս, բայց առիթների դեպքում փորձում եմ հասցնել և որևէ նվեր անպայման գնել նրա համար»:

Իսկ Արմուշի գործն ավելի հեշտ է եղել։ Ինչպես պատմեց հումորիստը՝ իր զոքանչի հետ ծանոթացել է շատ ավելի վաղ, քան կպատկերացներ, որ ինքը նրա փեսան է դառնալու։ «Քանի որ կինս լուսահոգի Վարդուհի Վարդանյանի ամուսնու քույրն է, ապա առաջին անգամ իմ ներկայիս զոքանչի հետ հենց Վարդուհու միջոցով եմ ծանոթացել՝ որպես Թութուշի ընկեր: Ու մինչ պաշտանապես նրա փեսան դառնալու մասին իրեն հայտնելը, մեր հարաբերություններն արդեն հասցրել էին բավականին մտերմանալ, ուստի այդ նորությունը հումորի միջոցով ընդունեց ու այն ավելի ամրապնդեց մեր հարաբերությունները»,- ավելացրեց հումորիստը:

Պարզվում է՝ Արմուշը բավականին ուշադիր փեսա է, և տոներին չի մոռանում իր զոքանչի մասին. «Հիմնականում նվերներ գնում եմ ծննդյան և կանանց նվիրված տոներին: Պատահել է նաև, որ ես և կինս որոշել ենք՝ այս կամ այն իրը պետք է նվեր առնենք ու գնել ենք՝ առանց որևէ առիթի»:

Իսկ արդյոք այսօր կշնորհավորի Արմուշը իր զոքանչին նրա օրվա արթիվ, հումորիստը ծիծաղելով պատասխանեց. «Վա՜յ, իհարկե շնորհավորելու եմ. թռցնելու եմ օդ»:

Ռուբինա Հակոբյան