ՀՀ նախագահի մրցանակ-2012. ընդունվում են հայտեր

Ս. թ. դեկտեմբերի 1-ից մինչև 2013 թ. հունվարի 31-ը ընդունվում են հայտեր Հայաստանի Հանրապետության նախագահի մրցանակ շնորհելու համար:

Հայաստանի Հանրապետության նախագահի մրցանակը ֆինանսավորում է «Պողոսյան» հիմնադրամը /Բելգիա-Շվեյցարիա/: Մրցույթի կազմակերպչական աշխատանքներն իրականացնում է «Հայաստան» համահայկական հիմնադրամը:

Մրցանակը շնորհվում է յուրաքանչյուր տարի՝ լավագույն ստեղծագործություններ, հայտնագործություններ /գյուտեր/ և աշխատանքներ կատարած Հայաստանի Հանրապետության քաղաքացի հանդիսացող հեղինակներին հետևյալ բնագավառներում.

արվեստ /այդ թվում՝ կերպարվեստ, ճարտարապետություն, կինոարվեստ, թատրոն, երգեցողություն, գործիքային կատարում, ֆոտոարվեստ, դիզայն, արվեստի տեսություն և այլն/,
գրականություն,
հումանիտար գիտություններ,
բնական գիտություններ,
տեխնիկական գիտություններ և ինֆորմացիոն տեխնոլոգիաներ,
ֆիզիկա,
բժշկագիտություն:

Մրցանակաբաշխությանը կարող են ներկայացվել միայն այն ստեղծագործությունները, որոնք առաջին անգամ հրատարակվել, հրապարակվել, կատարվել, ցուցադրվել, բեմադրվել, կառուցվել-ավարտվել են 2010-2012 թթ. ընթացքում:

Մրցանակաբաշխությանը չեն կարող ներկայացվել բառարաններ, փաստաթղթերի ժողովածուներ, հուշագրություններ, դասագրքեր, թեկնածուական և դոկտորական ատենախոսություններ:

Համաձայն մրցույթի պայմանների՝ դիմողը կարող է իր գործը ներկայացնել տվյալ բնագավառում գործող հաստատության կամ այլ անձի միջոցով, ինչպես նաև անձամբ:

Ներկայացման համար անհրաժեշտ փաստաթղթերը կարելի է ստանալ «Հայաստան» համահայկական հիմնադրամի գործադիր վարչության գրասենյակից և հիմնադրամի պաշտոնական կայքէջից՝ www.himnadram.org: