Վարչապետը պաշտոնանկ չի լինի, իսկ Գագիկ Ծառուկյանն ու ԲՀԿ–ն պետք է սատարեն Սերժ Սարգսյանին. Շարմազանով

ՀՀԿ արտահերթ համագումարը կկայանա դեկտեմբերի 15-ին, որի օրակարգում կլինի ՀՀ նախագահի թեկնածուի առաջադրման հարցը եւ բնականաբար, կլինի Սերժ Սարգսյանի առաջադրման հարցը։ ՀՀԿ գործադիր մարմնի նիստի ավարտից հետո լրագրողների հետ զրույցում հայտնել է ՀՀԿ մամլո խոսնակ, ԱԺ փոխնախագահ Էդուարդ Շարմազանովը:

Վարչապետի պաշտոնանկության հարցի վերաբերյալ ՀՀԿ մամլո խոսնակն ասել է. «ՀՀԿ ԳՄ նիստում վարչապետի հրաժարականի կամ փոփոխության հարց չի քննարկվել»: Շարմազանովի խոսքերով՝ իրականությանը չեն համապատասխանում նաև Գագիկ Ծառուկյանին վարչապետի պաշտոնը «խոսք տալու» մասին բոլոր ասեկոսեները։

ԳԱԼԱ-ի լրագրողի այն հարցին, թե ՀՀԿ եւ ԲՀԿ առաջնորդները հանդիպո՞ւմ են արդյոք, եւ ի՞նչ բնույթի հարցեր են քննարկում, ՀՀԿ մամլո խոսնակը պատասխանել է. «Սերժ Սարգսյանն ու Գագիկ Ծառուկյանը հանդիպել են, հանդիպում են ու կհանդիպեն, բայց պետք չէ այդ հանդիպումներից զարմանալ, քանի որ Գագիկ Ծառուկյանն Ազգային Օլիմպիական կոմիտեի անդամ է եւ, բնականաբար, կարող են լինել հանդիպումներ, բացի այդ, մենք կարող ենք շատ նորմալ համագործակցել այլ քաղաքական ուժերի հետ»:

ՀՀԿ մամլո խոսնակը, անդրադառնալով կոալիցիոն հուշագրին, նշել է, որ «Գագիկ Ծառուկյանն ու «Բարգավաճ Հայաստան» կուսակցությունը պետք է սատարեն ՀՀԿ առաջնորդ Սերժ Սարգսյանի թեկնածությունը: Այլ պաշտոնական հայտարարություն ԲՀԿ առաջնորդը ոչ արել է, ոչ էլ ստորագրել»: