The Washington Post: Քաթարի մասնակցությունը Գազայի քաղաքականությանը. աննպաստ Իրանի համար և ձեռնտու Իսրայելի՞ն

Նավթով հարուստ Արաբական ծոցի Քաթար պետության միապետ Շեյխ Համադ Բին Խալիֆա ալ-Թանին այս շաբաթ դարձավ օտար պետության առաջին ղեկավարը, ով այցելեց Գազայի իսլամիստական ղեկավարներին՝ նրանց կողմից 2007 թվականին Պաղեստինի տարածքների վրա վերահսկողություն սահմանելուց ի վեր:

Էմիրը նաև 400 միլիոն դոլար է տրամադրել՝ ի օգնություն Գազայի վերակառուցման: Համասը, որը դիտարկվում է որպես Իրանի դաշնակից, ընդդիմանում է Իսրայելին, հաճախ ուժգնորեն: Այնուհանդերձ, կան պատճառներ՝ մտածելու թե Քաթարի կողմից Համասին ձեռք մեկնելը կարող է լավ ազդեցություն ունենալ աշխարհի այն հատվածի վրա, որն իսկապես զգում է դրա կարիքը:

Reuters-ի վերլուծաբաններից մեկի կարծիքով՝ Քաթարը կարող է օգնել մեղմացնել լարվածությունը Համասի և մեկ այլ պաղեստինյան քաղաքական խմբավորման՝ Ֆաթահի միջև:

«Քաթարը, սուննի մահմեդական աշխարհում առաջատար դիրք զբաղեցնելով և Ծոցում իր ազդեցությունը տարածելով՝ հույս ունի դրդել Համասին հաշտվել Արևմուտքի կողմից հովանավորվող Պաղեստինի նախագահ Մահմուդ Աբասի՝ Ֆաթահ շարժման հետ. դրանով իսկ առաջ տանելով Մերձավոր Արևելքի խաղաղության գործընթացը»:

Դա է պատճառը, որ որոշ վերլուծաբաններ կարծում են, որ ԱՄՆ և Իսրայելն են հավանություն տվել Քաթարի այս քայլին: Նրանց նպատակն է՝ «վերաուղղորդել» Պաղեստինյան խմբերին, հեռացնելով նրանց Իրանից ու Սիրիայից և օգնել նրանց նոր գործընկերություն հաստատել արևմտամետ և սուննի մերձավորարևելյան պետությունների հետ: