«Առավոտ». Պետք չէ Թուրքիային ամեն անգամ ցույց տալ, թե մենք խելոք տղերք ենք

Հոկտեմբերի 25-ին նախագահ Սերժ Սարգսյանը շնորհավորական ուղերձ էր հղել Թուրքիայի նախագահ Աբդուլահ Գյուլին' Թուրքիայի ազգային տոնի առթիվ, թեև այն նշվում է հոկտեմբերի 29-ին, իսկ Ս. Սարգսյանը փաստորեն չորս օր շուտ է շնորհավորել թուրք գործընկերոջը:

«Առավոտ»-ը ՀՅԴ Հայ դատի և քաղաքական հարցերով գրասենյակի պատասխանատու Կիրո Մանոյանին հարցրեց, թե ինչպե՞ս է գնահատում այս քայլը` հաշվի առնելով հայ-թուրքական արձանագրությունների, ԼՂ խնդրի նկատմամբ Թուրքիայի դրսևորած կողմնակալ վերաբերմունբը: «Եթե ամսաթիվը չեն շփոթել, ապա իսկապես անհասկանալի է այսչափ շտապողականությունը: Չնայած' այնքան էլ հասկանալի չէ ընդհանրապես շնորհավորելու պահը, որովհետև Հայաստան-Թարքիա արձանագրությունների, ԼՂ խնդրի ուղղությամբ Թուրքիան ամեն հարցում արտահայտվելու իրավունք է իրեն վերապահում, անգամ Ստեփանակերտի օդանավակայանի հարցում պարտավորված են իրենց զգում ինչ-որ բան ասել: Միակ հավանական բացատրությունը թերևս այն է, որ Իրանի հետ պայմանագիր ստորագրվեց, և նախագահը Արևմուտքին ուզում է ասել, թե պատրաստ է նաև Թուրքիայի հետ լեզու գտնել: Այլապես' իսկապես ոչ մի բացատրություն, արդարացում չկա, թեև դա էլ արդարացում չէ, որովհետև ի վերջո պարզ է բոլորին, որ Հայաստանի այսօրվա իրավիճակի համար պատասխանատվություն ունի նաև Թուրքիան, որը թշնամական վերաբերմունք է ցուցաբերում Հայաստանի նկատմամբ' ՀՀ անկախության առաջին օրվանից պայմաններ առաջ քաշելով, շրջափակման ենթարկելով և մերժելով դիվանագիտական հարաբերությունների հաստատումը: Սա բարեկամական կեցվածք չէ: Ավելի քան 20 տարի է, ինչ Թուրքիան թշնամական վերաբերմունք է դրսևորում, և հետևաբար մենք մեզ չպետք է պարտավորված զգանք ամեն անգամ ցույց տալու, թե մենք խելոք տղերք ենք»,- նկատեց Կիրո Մանոյանը: