ՀՀԿ-ական պատգամավորները Հոկտեմբերի 27-ի մասին

ԱԺ ՀՀԿ–ական պատգամավոր Կարեն Ավագյանի կարծիքով Հոկտեմբերի 27–ը բացահայտելն իշխանությունների խնդիրը չէ։

«Դեպքն ամբողջությամբ իրավական դաշտում է, իշխանությունների խնդիրը չէ դա»,– անդրադառնալով այն հարցին, թե ինչ քայլեր է անում իշխանությունը դեպքը բացահայտելու համար, Լուրեր.com–ի հետ զրույցում ասաց Կարեն Ավագյանը։

Նրա խոսքերով՝ գործն ամբողջությամբ իրավական հարթություն է տեղափոխված. «Սա ամբողջությամբ իրավական դաշտում է, վճիռները և համապատասխան գործողությունները իրավական հարթությունում են իրականացվում»։

Անդրադառնալով լրագրողի այն հարցին, թե Հոկտեմբերի 27-ի ոճրագործության պես երևույթներ ծնող նախադրյալները վերացել են մեր երկրում, թե՝ ոչ, ՀՀԿ–ական պատգամավորն ասաց. «Իրականում, շատ դժվար հարց եք տալիս, ես ինքս Հոկտեմբերի 27 ծնող նախադրյալներին էլ տեղյակ չեմ, չեմ կարող ասել՝ կան, թե՝ ոչ։ Բայց այսօր, կարծում եմ, ցանկացած ոլորտում բազմաթիվ են առաջընթացները, և դա ակնհայտ է։ Նախադրյալների մասը թողնենք մի կողմ, բայց ընդհանուր զարգացվածության տեսանկյունից անհամեմատելի է 90-ականների հետ։ Ոչ մի ոլորտ չես կարող այսօր համեմատել 90–ականների հետ»։

Մարտի 1–ն ու Հոկտեմբերի 27–ն ընդհանրություններ ունե՞ն։ Այս հարցին ՀՀԿ պատգմավորը կտրուկ պատասխանեց. «Բացարձակ ո՛չ»։

ԱԺ ՀՀԿ–ական պատգամավոր Կարինե Աճեմյանի կարծիքով Հոկտեմբերի 27–ը բացայտված չէ. «Իհարկե ո՛չ։ Չի բացահայտված, բայց ինչ–որ չափով բացահայտված է»,–Լուրեր.com-ի հետ զրույցում ասաց Աճեմյանը։

Նրա կարծիքով սա այն գործն է, որը երկար ժամանակ է պահանջում. «Իրավապահ մարմինների կողմից այդ աշխատանքը տարվում է։ Կոնկրետ հանցագործները գիտենք, որ իրենց պատիժը կրում են, այստեղ խնդիր չկա»,– ասաց նա։

Ըստ Աճեմյանի՝ այսօր մեր երկրում Հոկտեմբերի 27-ի ոճրագործության պես երևույթներ ծնող նախադրյալները վերացել են։

Իսկ այն հարցին, թե Հոկտեմբերի 27-ի և Մարտի 1-ի ողբերգություններն ընդհանրություններ ունեն, թե՝ ոչ, Աճեմյանն ասաց. «Մարտի 1-ի հետ ընդհանրություններ չկան»։

Գայանե Համբարձումյան