Պայթյունը Դամասկոսում խարխլեց փխրուն խաղաղությունը

5 մարդ է զոհվել և 30-ը վիրավորվել ուրբաթ օրը Դամասկոսի Դաֆ ալ Շուկ բնակելի թաղամասում մեքենայում տեղադրված ռումբի պայթյունի հետևանքով: Տուժածների մեջ կան բազմաթիվ երեխաներ, քանի որ դեպքի վայրին մոտ էր գտնվում խաղահրապարակը. հայտնում է  BBC-ն: 

Այս հարձակումը, որի պատասխանատվությունը ոչ ոք իր վրա չի վերցրել, ևս մեկ հարված էր մուսուլմանական Զոհաբերության տոնի կապակցությամբ կնքված փխրուն 72-ժամյա զինադադարին:

Զինադադարը, որը կնքվել էր ՄԱԿ-ի և Արաբական երկրների հատուկ ներկայացուցիչ Լախդար Բրահիմիի ջանքերով և ուժի մեջ էր մտել ուրբաթ օրը տեղական ժամանակով առավոտյան ժամը 6:00-ից, տևեց ընդամենը մի քանի ժամ:

Դիտորդները հաղորդում են, որ ուրբաթ օրը բախումներ են նկատվել Դամասկոսում, Հոմսում, Իդլիբում: Զինադադարից ընդամենը ժամեր անց պայթյուն էր որոտացել Դամասկոս-Հալեպ մայրուղու վրա, իսկ Դարայում մեքենայում տեղակայված ռումբից զոհվել է կառավարական 3 զինծառայող:

Այս տեղեկությունների իսկությունը ստուգել հնարավոր չէ, սակայն թուրք-սիրիական սահմանին գտնվող BBC-ի թղթակիցը հաղորդում է, որ ամբողջ ուրբաթ օրվա ընթացքում սիրիական կողմից կրակոցներ էին լսվել:

Փորձագետների կարծիքով պայթյունը Դամասկոսում կարող է խզել հրադադարի ռեժիմը: ՄԱԿ-ի ԱԽ-ն ոչ մի կերպ չի մեկնաբանել այս իրադարձությունները: