Ռոմնին Օբամային անվանել է «իր սեփական գունատ ստվերը»

Այովա նահանգում ուրբաթ օրը տեղի ունեցած տնտեսագիտական ելույթի ժամանակ ԱՄՆ-ի նախագահի թեկնածու Միթ Ռոմնին Բարաք Օբամային մեղադրել է թույլ տնտեսական քաղաքականություն վարելու, նախընտրական խոստումները չկատարելու համար և նշել է, որ Օբաման իր նախագահության տարիներին եղել է «իր սեփական գունատ ստվերը». հաղորդում է BBC-ն: 

«Կայանալիք քվեարկությունն ընտրության հնարավորություն է վերջին 4 տարիների ստատուս քվոյի պահպանության և նոր հույս տվող ապագայի միջև»,-հայտարարել է Ռոմնին իր նախընտրական քարոզարշավի ժամանակ:

«Օբաման վատ ժառանգություն չէր ստացել, սակայն չկարողացավ լուծել տնտեսական խնդիրները, բարելավել առողջապահությունը, կրճատել պետական պարտքը», ավելացրել է Ռոմնին:

Օբաման իր հերթին նույնպես ելույթ է ունեցել հայտարարությամբ այն կապակցությամբ, որ համաձայն ուրբաթ օրը Առևտրի նախարարության հրապարակած տվյալների՝ ԱՄՆ-ի տնտեսական աճը սեպտեմբեր ամսվա դրությամբ տարվա կտրվածքով աճել է 2%-ով:

Մեկնաբանելով Այովայում Ռոմնիի ելույթը՝ Դեմոկրատները չեն զլացել նշել, որ Ռոմնին հանդիպում է ընտրազանգվածների հետ Kinzler Construction Services շինարարական ընկերության նախաձեռնությամբ, որը կառավարությունից 650 հազար դոլար հակաճգնաժամային օգնություն է ստացել Օբամայի նախաձեռնությամբ 2009թ. ընդունած օրենքի շնորհիվ, որի ընդունումը հանրապետականները փորձում էին ձախողել:

Հիշեցնենք, որ ԱՄՆ-ում նախագահական ընտրությունները կայանալու են նոյեմբերի 6-ին: