Հիլարի Քլինթոնն Իրանին կոչ է անում ազատ արձակել Սախարովի մրցանակի դափնեկիրներին

ԱՄՆ-ի պետքարտուղար Հիլարի Քլինթոնը շնորհավորել է Իրանի քաղաքացիական հասարակության ակտիվիստներ Նասրին Սոթուդեհին և Ջաֆար Փանահիին Եվրախորհրդարանի կողմից նրանց մտքի ազատության համար ակադեմիկոս Սախարովի անվան մրցանակ շնորհելու կապակցությամբ:

«Մենք կոչ ենք անում Իրանի իշխանություններին անմիջապես ազատ արձակել Սոթուդեհին և չեղյալ հայտարարել Փանահիի նկատմամբ սահմանափակումները, ազատ արձակել բոլոր քաղբանտարկյալներին, ինչպես նաև բոլոր նրանց, ովքեր ձերբակալվել են իրենց կրոնական և քաղաքական հայացնքերի համար»,-նշել է ամերիկյան դիվանագիտության ղեկավարը. տեղեկացնում է ИТАР-ТАСС-ը:

«Մենք նաև ուզում ենք շնորհավորել մյուս մրցանակակիրներին, ովքեր եզրափակիչ են դուրս եկել, նրանք են՝ Ալես Բելյացկին և ռուսական Pussy Riot պանկ խմբի անդամներ Տոլոկոննիկովան, Սամուցևիչն ու Ալյոխինան»,-հավելել է պետքարտուղարը:

Հիշեցնենք, որ Եվրախորհրդարանի քաղաքական խմբավորումների առաջնորդները միաձայն 2012թ. Սախարովի անվան մրցանակի դափնեկիր են ընտրել իրանական ընդդիմության երկու ներկայացուցչի՝ Նասրին Սոթուդեհին և Ջաֆար Փանահիին: Այս մասին ուրբաթ օրը հայտարարել է ասամբլեայի նախագահ Մարտին Շուլցը:

Շուլցն այդ անձանց մրցանակ շնորհելը համարում է Իրանի իշխանությունների նկատմամբ Եվրախորհրդարանի արտահայտած բողոքի նշան և կոչ է արել Իրանին թույլ տալ դափնեկիրներին ժամանել Ֆրանսիա դեկտեմբերի 12-ին մրցանակի հանդիսավոր շնորհման արարողությանը ներկա գտնվելու համար:

Նասրին Սոթուդեհն իրավապաշտպան փաստաբան է, որին դատապարտել են 11 տարվա ազատազրկման պետական անվտանգությանը վնաս հասցնելու մեղադրանքով:

Ջաֆար Փանահին կինոռեժիսոր է, ում իրանական իշխանություններն արգելում են դուրս գալ պետության սահմաններից: