Արյունոտ զինադադար Սիրիայում

Իսլամական մեծագույն տոներից մեկի՝ Զոհաբերության տոնի (Աիդ ալ Ադհա կամ Կուրբան Բայրամ) օրերին սիրիական զինված ուժերի հրամանատարությունը հայտարարել էր ռազմական գործողությունների դադարի մասին: Սակայն ընդդիմադիր զինված խմբավորումների մի քանիսը հրաժարվել էին զենքը վայր դնել:

Զինադադարի հենց առաջին օրերին զինված բախումների արդյունքում երկրում զոհվել է 146 մարդ. հաղորդում է Agence-France-Press-ը՝ հղում կատարելով Լոնդոնում գործող մարդու իրավունքների պաշտպանության մոնիթորինգի սիրիական կենտրոնին: Ավելի վաղ հայտնվում էր 47 զոհի մասին:

Իրավապաշտպանների տեղեկություններով, որոնք, ինչպես նշում է գործակալությունը, հիմնված են Սիրիայում իրենց ակտիվիստների հաղորդած տվյալների վրա, նախօրեին մարտերում զոհվել է 53 խաղաղ բնակիչ, 50 զինված ընդդիմադիր և 43 կառավարական զինծառայող:
Հիշեցնենք, որ սիրիական զինված ուժերի հրամանատարությունը հինգշաբթի օրը հայտարարել էր Զոհաբերության տոնի կապակցությամբ 3-օրյա զինադադարի ռեժիմի հաստատման մասին: Ընդ որում, սիրիական զինվորական հրամանատարությունն իրեն իրավունք էր թողել խաղաղ բնակչության և կառավարական զորքերի նկատմամբ ահաբեկչական հարձակման դեպքում պատասխան կրակ բաց թողնել հակառակորդի ուղղությամբ:

Ավելի վաղ «Ալ Քաիդա»-ի հետ կապված «Դհեբհաթ ան Նուսրա» խմբավորումը մերժել էր ռազմական գործողությունները դադարեցնելու մասին առաջարկը, հայտարարելով, որ չի վստահում Սիրիայի կառավարությանը:

Զոհաբերության տոնի (Աիդ ալ Ադհա կամ Կուրբան Բայրամ) ընթացքում հրադադար հայտարարելն առաջարկել էր ՄԱԿ-ի և Արաբական պետությունների լիգայի Սիրիայի հարցերով հատուկ բանագնաց Լախդար Բրահիմին:

Սիրիական բանակը պետք է դադարեցներ ռազմական գործողություններն ուրբաթ օրն առավոտյան ժամը 5:00-ից մինչև երկուշաբթի օրը, սակայն կառավարական բանակը իրավունք ունի հարձակման դեպքում պատասխան տալ ապստամբներին: