ԱԺ պատգամավորները հարգանքի տուրք մատուցեցին Հոկտեմբերի 27-ի զոհերի հիշատակին (տեսանյութ)

Այսօր Ազգային ժողովի բակում գտնվող 1999–ի Հոկտեմբերի 27-ին Հայաստանի խորհրդարանում ոճրագործության զոհ դարձած պետական ու քաղաքական գործիչների հիշատակը հավերժացնող հուշակոթողի մոտ իրենց հարգանքի տուրքն են մատուցել ԱԺ ՀՀԿ, ՀԱԿ, ԲՀԿ, «Ժառանգություն», ՕԵԿ խմբակցությունենրի պատգամավորները։

Հուշակոթողի մոտ իր հարգանքի տուրքը մատուցելու էր եկել նաև Կարեն Դեմիրճյանի կինը։ Նա նշեց, որ Հոկտեմբերի 27–ը բացահայտելու պահանջն ուժի մեջ է միշտ։ Դա միանշանակ է։

«Այսօր, այս պահին ես ուզում եմ շնորհակալություն ասել ԱԺ ղեկավարությանը՝ Հովիկ Աբրահամյանին՝ Հոկտեմբերի 27-ի այդ չարաբաստիկ օրը հետևողականորեն հիշելու, մեր նահատակներին հարգելու համար»,– ասաց նա։

Լրագրողների հետ զրուցեց նաև ԱԺ ղեկավար Հովիկ Աբրահամյանը։ Նրա խոսքերով սա ոճրագործություն էր, սա ցեղասպանություն էր հայ ազգի նկատմամբ, պետության նկատմամբ։

Աբրահամյանը համաձայն է, որ եթե իրոք կան ինչ–որ թաքնված դեպքեր, պետք է հայտնաբերվեն և բացահայտվեն։

Անդրադառնալով լրագրողներից մեկի այն հարցին, որ կարծիքներ կան, որ ջանքեր չեն գործադրվում գործը բացահայտելու համար, Աբրահամյանն ասաց. «Ես համամիտ չեմ։ Ջանքեր միշտ էլ գործադրվել են։ Այդ պահին նույնիսկ այնպիսի մարդիկ են շահագրգռված եղել, որ մինչև վերջ գործը բացահայտվի։ Դա կորուստ էր մեր պետության համար, գլխատվեց ողջ իշխանությունը։ Սա իրոք ցեղասպանությունից ավելի բարձր ոճրագործություն էր»։

Հիշեցնենք, որ 1999-ի Հոկտեմբերի 27-ին Ազգային ժողովում կառավարության հետ հարցուպատասխանի ժամանակ Նաիրի Հունանյանի զինված հանցախումբը, ներխուժելով խորհրդարանի նիստերի դահլիճ, իրականացրեց աննախադեպ ահաբեկչություն, գնդակահարելով 8 պետական գործիչների՝ Ազգային ժողովի նախագահ Կարեն Դեմիրճյանին, վարչապետ Վազգեն Սարգսյանին, խորհրդարանի փոխնախագահներ Յուրի Բախշյանին և Ռուբեն Միրոյանին, պատգամավորներ Արմենակ Արմենակյանին, Միքայել Քոթանյանին, Հենրիկ Աբրահամյանին և նախարար Լեոնարդ Պետրոսյանին:

2003–ի դեկտեմբերի 2-ի դատավճռով Երևանի Կենտրոն և Նորք-Մարաշ համայնքների առաջին ատյանի դատարանը ցմահ ազատազրկման դատապարտեց Նաիրի Հունանյանին և նրա հանցախմբի 5 անդամներին, հանցախմբի ևս մեկ անդամ դատապարտվեց 14 տարվա ազատազրկման: