Քաղաքացիները Հոկտեմբերի 27-ի ոճրագործության մասին (տեսանյութ)

1999 թվականի Հոկտեմբերին հոկտեմբերի 27-ին Հայաստանի Հանրապետության Ազգային ժողովի նիստերի դահլիճում տեղի ունեցավ ՀՀ բոլոր ժամանակներում գրանցված ամենադաժան ոճիրը, այդ օրը գլխատվեց ՀՀ քաղաքական էլիտան:

ԱԺ նիստերի դահլիճում սպանվեցին ԱԺ նախագահ Կարեն Դեմիրճյանը, ՀՀ վարչապետ Վազգեն Սարգսյանը, ԱԺ փոխնախագահներ Յուրի Բախշյանը, Ռուբեն Միրոյանը, պատգամավորներ Միքայել Քոթանյանը, Հենրիկ Աբրահամյանը, Արմենակ Արմենակյանը, նախարար Լեոնարդ Պետրոսյանը: Վիրավորվեցին պատգամավորներ և նախարարներ:

Այսօր Եռաբլուրը մարդաշատ էր՝ քաղաքացիներ, երեխաներ, պատերազմի մասնակիցներ, Երևանի քաղաքապետ Տարոն Մարգարյանը, ԱԺ փոխնախագահ Էդուարդ Շարմազանովը և ՀՀԿ մի շարք բարձրաստիճան այրեր, ովքեր եկել էին իրենց հարգանքի տուրքը մատուցելու ոճրագործության զոհ դարձած Վազգեն Սարգսյանի շիրիմին։ Lurer.com-ը զրուցեց քաղաքացիների հետ, ովքեր ծաղիկներ էին դնում սպարապետի շիրիմին։ Նրանց խոսքերում մի ընդհանուր բան կար՝ բոլորը ցավով ու ափսոսանքով էին խոսում այն քաղաքական գործիչների կորստյան մասին, ում հետ ժամանակին մեծ հույսեր էին կապում։