Հովիկ Աբրահամյանը ԲՀԿ-ի և ՀՀԿ-ի ամուսնության մասին

Այսօր քաղաքական դաշտում տեղի են ունենում մի շարք լուրջ գործընթացներ՝ ապահարզաններ ու ամուսնության առաջարկություններ, դավաճանություններ ու սեռական հարաբերություններ, որոնք արդեն սպառել են «Քաղաքական կամասուտրայի» բոլոր դիրքերն ու ոճերը: Վերջին շրջանում ամենացանկալին դարձել է ԲՀԿ-ն, որին տարատեսակ առաջարկություններ են անում քաղաքական դաշտի գրեթե բոլոր խաղացողները՝ երբեմն անցնելով բարեկրթության սահմանները և «8-ամյա երեխային» ներգրավելով էրոտիկ խաղերի մեջ:

Ընթացող գործընթացների շուրջ զրուցեցինք ԲՀԿ հոգաբարձուների խորհրդի անդամ, ԲՀԿ-ում ՀՀԿ-ի արտակարգ դեսպան, ծերակույտի նախագահ Հովիկ Աբրահամյանի հետ:

- Պարո՛ն Աբրահամյան, ներկայիս քաղաքական դաշտում տեղի են ունենում մի շարք գործընթացներ, վերադասավորման փորձեր, նույնիսկ թվում է, թե ՀԱԿ-ԲՀԿ շփումներն ընդունել են ՀԱԿ-ի կողմից ԲՀԿ-ի «թեմաները փակելու» բնույթ: Ինչպե՞ս կգնահատեիք այս գործընթացները:

-Իսկապես ԲՀԿ-ի շուրջ տեղի են ունենում տարբեր բնույթի մի շարք գործընթացներ, սակայն ես՝ որպես ԲՀԿ հոգաբարձուների խորհրդի անդամ (Աղվա՛ն, իրար չխառնվես, ԲՀԿ-ի, ոչ թե Սիվիլիթասի, և իմացի՛, որ հոգաբարձուների խորհրդի ոչ բոլոր անդամներն են փողերի լվացմամբ զբաղվում), հայտարարում եմ, որ ԲՀԿ-ի հետ ոչ ոք չի կարող լավ հարաբերություններ հաստատել առանց մեր խորհրդի համաձայնության:

-Այսինքն ՀԱԿ-ԲՀԿ հարաբերություններում չեմ ասում նշանադրություն, բայց գոնե «խոսքկապ» չի՞ լինի:

- Նորից եմ ասում, առանց մեր խորհրդի համաձայնության՝ ո՛չ: Դա պետք է քննարկվի մեր՝ իմ, խորհրդի նախագահի և նրա մտերիմ բարեկամ Սիմբայի կողմից:

- Փաստորեն հնարավո՞ր չէ։

- Դե՛ դա կարող է տեղի ունենալ, եթե բխի «8-ամյա երեխայի» և իր հոգաբարձուների շահերից:

- Իսկ ձեր կուսակալությունը հետաքրքրվա՞ծ չէ ԲՀԿ-ի հետ հարաբերություններով։

- Այսօր ժամանակները փոխվել են, այլևս հնացած են սիրահետելու հին մեթոդները, որոնք օգտագործվում են ՀԱԿ-ի, մասնավորապես՝ Լևոն Ժուանի կողմից:

- Իսկ դուք ի՞նչ եք անում։

- Մենք միանգամից կապում ենք սինիներն ու գնում խնամախոսության:

- Ի՞նչ սինիներ։

- Դե՛, կապել ենք 3 նախարարի, մի 3 մարզպետի ու էլի մանր-մունր պաշտոնների խառը սինիներ, մնացել է գլխավոր սինին, որը պետք է կապենք համաժողովրդական հանրաքվեի միջոցով:

- Ո՞րն է այդ սինին։

- Փոխվարչապետի սինին։

- Իսկ եթե ամուսնությունը չստացվի՞։

- Կառևանգենք ԲՀԿ-ի քեռուն, ում արդեն մի քանի անգամ նախազգուշացրել ենք այդ մասին:

- Փաստորեն ՀՀԿ-ն կո՞ղմ է բազմամուսնությանը։

- Ո՛չ։

- Այդ դեպքում ի՞նչ է լինելու ՕԵԿ-ի հետ։

- Դուք լուրջ լրագրող եք, մի՞թե չեք տարբերում անլուրջ սեռական կապերը լուրջ սիրային հարաբերություններից։

- Իսկ հարսանիքին արդեն նախապատրաստվե՞լ եք։

- Այո՛։

- Սեղանին ի՞նչ է լինելու։

- Դե կարելի է ասել ամեն ինչ, բայց ամենակարևորը խորովածի ու քյաբաբի տեսականին է. խոզի, տավարի, ոչխարի, բեզոարյան ա…

Գրանտակեր Հակապետականյան

Հ.Գ. Հատուկ բութերի, կիսագրագետների և քլունգների համար նշենք, որ սա հումոր է. իրականում նման հարցազրույց չի եղել։