Սյունիքում առկա են զբոսաշրջության զարգացման հեռանկարներ

ՀՀ փոխվարչապետ, տարածքային կառավարման նախարար Արմեն Գևորգյանը երեկ այցելել է Սյունիքի մարզ, որտեղ ծանոթացել է պետական ծրագրերով իրականացվող աշխատանքների ընթացքին:

Մարզպետ Ս. Խաչատրյանի ուղեկցությամբ փոխվարչապետն այցն սկսել է Սիսիանի տարածաշրջանի Շամբ համայնքից, որտեղ դպրոցի շենքի կառուցման համար մարզի առաջնահերթ խնդիրների լուծման երրորդ ծրագրով հատկացվել է 47 մլն դրամ: Զեկուցվել է, որ ծրագրով նախատեսված աշխատանքների մոտ 60 տոկոսը կատարվել է, դպրոցի կառուցումն ավարտին հասցնելու համար աշխատանքները կշարունակվեն նաև Հայաստանի սոցներդրումների հիմնադրամի միջոցներով:

Ավարտին են մոտենում Աղիտու-Շամբ 9,6 կմ ճանապարհահատվածի վերանորոգման աշխատանքները: Պետբյուջեից այդ նպատակով հատկացվել էր 790 մլն դրամ: Փոխվարչապետը ծանոթացել է կատարված աշխատանքներին, զեկուցվել է, որ ասֆալտապատումն ամբողջությամբ ավարտված է, և մինչև հոկտեմբերի վերջ կավարտվեն նաև հարդարման աշխատանքները:

Պետբյուջեից հատկացված 250 մլն դրամով ավարտվել է նաև մայրուղուց Քարահունջ համայնք տանող 2,3 կմ դժվարանցանելի ճանապարհի վերանորոգումը: Փոխվարչապետին ներկայացվել են կատարված աշխատանքները, նշվեց, որ համայնքի համար ճանապարհի նորոգումը կենսական նշանակություն ուներ:

Այնուհետև Սյունիքի մարզպետարանում փոխվարչապետը խորհրդակցություն է անցկացրել մարզպետի, մի շարք համայնքների ղեկավարների, տարածաշրջանի ՋՕԸ-երի ղեկավարների, մարզպետարանի պատասխանատուների մասնակցությամբ: Ինչպես մյուս մարզպետարաններում անցկացված խորհրդակցություններում, այստեղ ևս քննարկվող հարցերը վերաբերում էին սեփական եկամուտների հավաքագրմանը, 2013թ. համայնքների բյուջեների կազմման գործընթացին, մարզում իրականացվող ծրագրերի, գյուղատնտեսական աշխատանքների ընթացքին:Ներկայացվել են մարզի համայնքներում սեփական եկամուտների կատարողականի ցուցանիշները, զեկուցվել ծրագրերի ընթացքը:

Փոխվարչապետը պարզաբանումներ է ներկայացրել նաև համայնքապետերի կողմից բարձրացված հարցերի վերաբերյալ:
Խորհրդակցությունից հետո փոխվարչապետը մարզպետի և Կապանի նորընտիր քաղաքապետ Ա. Հայրապետյանի ուղեկցությամբ ծանոթացել է քաղաքում պետբյուջեի միջոցներով իրականացվող աշխատանքների ընթացքին: Ա. Գևորգյանը եղել է Կապանի ընդհանուր իրավասության դատարանի, ինչպես նաև թիվ 2 ավագ դպրոցի շենքերի շինհրապարակներում, ծանոթացել կատարված աշխատանքերին: Երկու օբյեկտների շինարակական աշխատանքներն ընթացի մեջ են, և պատասխանատուները զեկուցել են, որ իրականացվում են համաձայն ժամանակացույցի:

Փոխվարչապետին ներկայացվել են նաև քաղաքում տարբեր աղբյուրների` պետբյուջեի, համայնքի, բարերարների միջոցներով ներհամայնքային ճանապարհների բարեկարգման ուղղությամբ կատարված աշխատանքները:

Վերադարձի ճանապարհին Ա. Գևորգյանը կանգ է առել Խնձորեսկում, եղել կախովի կամրջի հատվածում, որն անցնում է ձորի վրայով` կապելով Խնձորեսկի երկու «ափերը»: Տեղում համայնքի ղեկավարի հետ քննարկվել են ենթակառուցվածների բարելավման հարցեր` հաշվի առնելով, որ առկա են զբոսաշրջության զարգացման լավ հնարավորություններ: