Չինաստանում տղամարդն օդապարուկների մրցույթի ժամանակ խճճվել է թելերի մեջ և օդ բարձրացել (տեսանյութ)

Մրցույթի մասնակիցը մի քանի վայրկյան անցկացրել է օդում՝ չկարողանալով ազատվել թելերից։ Այս մասին հայտնում է China Press-ը՝ հրապարակելով ականատեսների նկարահանած տեսանյութը։

Չորեքշաբթի՝ ապրիլի 26-ին Ուհան քաղաքում անցկացված օդապարուկների միջազգային մրցույթի ժամանակ տհաճ միջադեպ է տեղի ունեցել Mulan Grassland արգելոցի տարածքում։

Մրցակիցներից մեկը խճճվել է հսկա օդապարուկի թելերի մեջ և բարձրացել օդ։ Ականատեսների վկայությամբ՝ նա գտնվել է մոտավորապես չորրորդ հարկի բարձրության վրա։ 

Բարեբախտաբար, նա երկար չի մնացել օդում։ Քամու պոռթկումը դադարել է, և օդապարուկը ապահով վայրէջք է կատարել: