ԵԱ․ Գոռ Ազիզյանը եզրափակիչում է

Երեւանի «Միկա» մարզահամալիրում անցկացվող բռնցքամարտի Եվրոպայի երիտասարդական առաջնությունում Հայաստանի ներկայացուցիչներից առաջինը եզրափակիչ դուրս եկավ Գոռ Ազիզյանը (57 կգ)։ Նա կիսաեզրափակիչում պարտության մատնեց Ռուսաստանի ներկայացուցիչ Մագոմեդ Պաշտաեւին:

Հայաստանի ներկայացուցիչներից կիսաեզրափակիչում առաջինը ռինգ էր դուրս եկել Հովհաննես Հարությունյանը (48 կգ), որը  պարտվել էր Իտալիայի ներկայացուցիչ Տոմասո Կանոնեի հետ՝ բավարարվելով բրոնզե մեդալով։ Արցախցի Էրիկ Առստամյանը (54 կգ) կիսաեզրափակիչում պարտվել էր Վրաստանը ներկայացնող Գոռ Այվազյանի հետ՝ դառնալով բրոնզե մեդալակիր։

Ցերեկային մրցահերթում Դավիթ Սաֆարյանը (51 կգ) կմրցի Գերմանիան ներկայացնող Միել Ֆրանսիս Օկայի հետ: 

Երեկոյան մրցահերթում Արթուր Մկրտչյան (63,5 կգ) եզրափակիչի ուղեգրի համար կպայքարի ռումինացի Արունի Նիկու Տուդորոյի հետ:

Յուրա Բաբլումյանի (67 կգ) մրցակիցը ռուսաստանցի Ալեքսեյ Գուկովն է:

Արման Միսկարյանը (71 կգ) կմրցի հունգարացի Քրիստիան Նիլեբորգի հետ:

Արմեն Պողոսյանը (75 կգ) կմենամարտի Իտալիայի ներկայացուցիչ Կիրո Դելե Կուրտոյի հետ:

Աղվան Ալեքսանյանը (80 կգ) կփորձի հաղթահարել ռումինացի Դավիթ-Անգելո Տեոդոսեսկոյի արգելքը:

Դավիթ Սիմոնյանը (86 կգ) կմրցի ռումինացի Դումիտրել Բադեայի հետ:

Իշխան Հովսեփյանի (92 կգ) մրցակիցը Ռումինիայի ներկայացուցիչ Ֆլորին Իոնիտան է:

Հայաստանի վերջին ներկայացուցիչ Ալբերտ Հարությունյանի (+92 կգ)  մրցակիցն էլ խորվաթ Լովրո Պավցեցն է:

Երեկոյան մրցահերթը կմեկնարկի 17:30-ին:

Մայիսի 2-ին հանգստյան օր է:  Եզրափակիչները տեղի կունենան մայիսի 3-ին: