ԱԱ․ Բռնցքամարտի Հայաստանի թիմն այսօր ունի մեկ մասնակից

Ուզբեկստանի մայրաքաղաք Տաշքենդում անցկացվող բռնցքամարտի տղամարդկանց աշխարհի առաջնությունում մայիսի 7-ին Հայաստանի հավաքականն ունի մեկ մասնակից։

57 կգ քաշային կարգում քառորդ եզրափակիչի մենամարտը (ցերեկային մրցահերթ) կանցկացնի Արթուր Բազեյանը։ Նրա մրցակիցը կլինի հորդանանցի Յուսեֆ Յաշաշը։

Եվրոպայի առաջնության արծաթե մեդալակիրը 1/8 եզրափակիչում 5:0 հաշվով հաղթել էր իրանցի Պոուրիա Աբդուլմալեկիերին։

Հիշեցնենք, որ մայիսի 6-ին կիսաեզրափակիչ է դուրս եկել Հայաստանի հավաքականի առաջատար Հովհաննես Բաչկովը (63,5 կգ)։ 

Տոկիոյի Օլիմպիական խաղերի բրոնզե մեդալակիր, Եվրոպայի եռակի չեմպիոն, աշխարհի առաջնության եռակի բրոնզե մեդալակիրը մենամարտել է Թուրքիայի ներկայացուցիչ Կանլի Բիլգե Կագանի հետ եւ հաղթել 5:0 հաշվով։

Հովհաննես Բաչկովն ապահովել է Հայաստանի առաջին բրոնզե մեդալն այս առաջնությունում։

Հաղթանակներ են տարել նաեւ Եվրոպայի փոխչեմպիոններ Ռաֆայել Հովհաննիսյանը (86 կգ), Եվրոպայի առաջնության բրոնզե մեդալակիր Նարեկ Մանասյանը (92 կգ) եւ Գուրգեն Մադոյանը (67 կգ)։

Աշխարհի փոխչեմպիոն Դավիթ Չալոյանը (92+ կգ) 1/8 եզրափակիչում 0:5 հաշվով պարտվել է չինացի Դանաբիեկե Բայկեվուզիին։ Բարեղամ Հարությունյանը (48 կգ) 1/16 եզրափակիչում 0:4 հաշվով պարտվել է կուբացի Ալեխանդրո Կլարոյին։ Ռուդոլֆ Գարբոյանը (51 կգ) 1/16 եզրափակիչում 1:4 հաշվով պարտվել է Տայպեի ներկայացուցիչ Պո-Վեյ Տուին։

60 կգ քաշային կարգում Արթուր Ղազարյանը 1/16 եզրափակիչում նոկաուտով հաղթել էր Բուրունդին ներկայացնող Մուհամեդ Նտունգիեբոսեին, 1/8-րդ եզրափակիչում պարտվել է Զամբիայի ներկայացուցիչ Էնդրյու Չիլատային։

Համբարձում Հակոբյանը (80 կգ) 1/16 եզրափակիչում պարտվել է Չինաստանի ներկայացուցիչ Տ. Կե Թուոհետաերբիեին։