«Հայաստան» խմբակցության պատգամավորներն այցելել են Վայոց Ձորի և Տավուշի մարզեր

Աժ «Հայաստան» խմբակցության պատգամավորներն այցելել են Վայոց Ձորի և Տավուշի մարզեր, որտեղ հանդիպումներ են ունեցել քաղաքացիների հետ։

Վայոց Ձոր կատարած այցի ընթացքում Գեղամ Մանուկյանը և Մհեր Սահակյանը երկրում ստեղծված իրավիճակի և առաջիկա անելիքների վերաբերյալ առանձնազրույցներ և քննարկումներ են ունեցել Ջերմուկ և Վայք համայնքների բնակիչների հետ։

Խմբակցության մի խումբ պատգամավորներ նույն ժամանակահատվածում այցելել են Տավուշի մարզ։ Սեյրան Օհանյանը, Գառնիկ Դանիելյանը, Արգիշտի Գևորգյանը և Քրիստինե Վարդանյանը այցելել են Նոյեմբերյան խոշորացված համայնքի գյուղեր, որտեղ հանդիպումներ և քննարկումներ են ունեցել համայնքների բնակիչների հետ։

Մարզային այցելությունները կրելու են շարունակական բնույթ։

Անդրադառնալով Տավուշ այցին պատգամավոր Գառնիկ Դավթյանը գրառում է կատարել․

«Հարգանքի տուրք մատուցեցինք 1991 թ․ մայիսի 6-ին զոհված ոստիկանների հիշատակին։  Այնուհետև այցելեցինք Զորական, Կողբ և Դեղձավան համայնքներ։ Դեղձավանի անջրդի հողակտորների և ոռոգելի ջրի խնդրի մասին բարձրաձայնել և պատկան մարմիններին դիմել եմ բազմիցս։

Երեկ մեկ անգամ ևս ուսումնասիրեցինք և արձանագրեցինք խնդիրը։ Զրուցեցինք նշված համայնքների բնակիչների հետ, լսեցինք նրանց խնդիրներն ու առաջարկները։ Տավուշեցուն այսօր մտահոգում է հատկապես մի քանի գյուղերի՝ այսպես կոչված «անկլավների» հանձնման շուրջ տարվող խոսակցությունները։ 

Հարցի շուրջ մենք ևս հայտնեցինք մեր տեսակետը։

Այս և այլ հիմնահարցերի առավել մանրամասն կանդրադառնամ իմ առաջիկա հրապարակումներում»,- գրել է նա։