Սատարում եմ Փաշինյանին. Լուկաշենկո

Ես, իհարկե, սատարում եմ Նիկոլ Վովաևիչին»,-այս մասին հունիսի 8-ին հայտարարել է Բելառուսի նախագահ Ալեքսանդր Լուկաշենկոն Հավաքական անվտանգության պայմանագրի կազմակերպության անդամ երկրների անվտանգության խորհուրդների քարտուղարների հետ հանդիպմանը, հայտնում է BelTA-ն։

«Հայաստանի և Ադրբեջանի միջև հակամարտության լուծումը պետք է ձեռնտու լինի երկու կողմերին։ Ե՛վ ադրբեջանցիները, և՛ հայերը մեր հարազատն են, նրանք նման են մի ձեռքի երկու մատի, ինչ ուզում ես, արա»,- նշել է Ալեքսանդր Լուկաշենկոն։

Նա ասել է, որ նախորդ տարիներին ինքը մեծ ջանքեր է ներդրել կողմերի միջև հակամարտությունը լուծելու համար՝ փորձելով փոխգործակցություն հաստատել Հայաստանի և Ադրբեջանի ղեկավարների միջև։

«Հիմա ամեն ինչ ավելի է բարդացել, պետք է կարգավորել այս իրավիճակը: Այս դեպքում, իհարկե, ես սատարում եմ Նիկոլ Վովաևիչին (Նիկոլ Փաշինյանին-խմբ.) գիտակցելով, որ այս բոլոր խնդիրներն ընկել են նրա վրա։ Ուստի հիմա մեզ պետք է համբերություն և փորձ՝ խնդրին լուծում գտնելու համար, որպեսզի դա ձեռնտու լինի և՛ Հայաստանին, և՛ Ադրբեջանին»,- ընդգծել է Լուկաշենկոն։

Ըստ նրա՝ ՀԱՊԿ երկրների անվտանգության խորհուրդների քարտուղարները նույնպես պետք է իրենց առաջարկներն անեն, քանի որ նրանք այս իրավիճակում պարզապես դիտորդ չեն։ «Դուք մեր հիմնական օգնականներն եք պաշտպանության և անվտանգության հարցերում»,- նշել է Լուկաշենկոն։

Ալեքսանդր Լուկաշենկոն հավելել է, որ երկիրը կձգտի օգնել Հայաստանին և Ադրբեջանին լուծել վեճերը։

«ՀԱՊԿ տարածքում հակամարտությունները, հատկապես զինված, պետք է լուծվեն։ Մենք չենք կարող հանգիստ հետևել, երբ ՀԱՊԿ տարածքում հակամարտություններ են լինում, մենք չենք կարող լքել դրանք։ Նրանք մեր եղբայրներն են»,- ասել է Լուկաշենկոն։