«Հայաստանի անլուրջ ու չմտածված առաջարկը Ադրբեջանին»

Ադրբեջանական կողմը դրական է պատասխանել սահմանազատման հանձնաժողովների հանդիպման մասին մեր առաջարկին, հունիսի 21-ին լրագրողներին ասել է ՀՀ փոխվարչապետ Մհեր Գրիգորյանը։

ԼՈՒՐԵՐ. com-ի հետ զրույցում, անդրադառնալով Մհեր Գրիգորյանի այս հայտարարությանը, «Հայաստան» խմբակցության պատգամավոր Գեղամ Մանուկյանը այն կարծիքը հայտնեց, որ սահմանազատման և սահմանագծման աշխատանքներ իրականացնելու համար ամենագլխավոր գործոններից մեկը դա երկու պետությունների միջև փոխվստահությունն է, որը Հայաստանի և Արդրբեջանի դեպքում չկա։

Մանուկյանի խոսքով` այս նախաձեռնության մասին շատ վաղուց էր հայտարարվել.

«Սահմանազատման և սահմանագծման համար ձևավորվող հանձնաժողովները պետք է հանգանալից քննության նյութ դարձնել․ նախ` ինչ քարտեզների հիման վրա է այդ աշխատանքը տեղի ունենալու, նոր անցնել աշխատանքի, որը մեր դեպքում շատ շտապ, ոտքի վրա իրականացվեց, առանց հանձնաժողովի քննության»։

Նրա խոսքով՝ երկրորդ հանգամանքը, որը շատ կարևոր է միջազգային պրակտիկայում` սահմանազատման և սահմանագծման աշխատանքները իրականացնելիս, դա փոխվստահության մթնոլորտի առկայությունն է․

«Երբ երկու երկրներ սահմանագծում և սահմանազատում են իրենց սահմանը, ունենում են քննարկումներ նաև աշխարհագրական տարբեր բարդությունների հետ կապված, բայց առաջին հերթին, պետք է ունենան միմյանց նկատմամբ փոխվստահություն։

Այժմ՝ Հայաստանի և Ադրբեջանի դեպքում, դրա մասին ուղղակի անհնար է խոսել, նույնիսկ մտածել, որովհետև Ադրբեջանը շարունակում է օկուպացված պահել Հայաստանի Հանրապետության սուվերեն տարածքների մի մասը, շարունակում է թշնամական ագրեսիվ քաղաքականությունը սահմանին։

Այս առումով դժվար է կանխատեսել, թե որևէ արդյունավետ արդյունք կարելի է ակնկալել դրանից»,- ասաց մեր զրուցակիցը։

Ըստ նրա` միայն այն փաստը, որ Հայաստանը և Ադրբեջանը չունեն դիվանագիտական հարաբերություններ, Ադրբեջանը օկուպացված պահում է Հայաստանի սուվերեն տարածքի մի մասը, խոսում է Հայաստանի առաջարկի ուղղակի չմտածված, անլուրջ լինելու ասին։

Մանուկյանը կարծում է, որ այս ամենից դրական տեղաշարժի սպասելը անիմաստ է։