Իրավական պրակտիկայում երբևէ նման դեպք չի եղել․ փաստաբանը՝ Վարդան Ղուկասյանի արտահանձնման մասին

«Կալանքը ծայրահեղ միջոց է և կալանքներ տալով՝ բացասական հետևանքների կրողը լինելու է պետությունը: Կարծում եմ՝ միջազգային ատյանները, ՄԻԵԴ-ը դրա իրավական գնահատականը կտան»,- ԼՈՒՐԵՐ.com-ի հետ զրույցում նման տեսակետ հայտնեց փաստաբան Լևոն Բաղդասարյանը՝ ընդգծելով, որ շարունակում են տարբեր քրեական վարույթներ հանձնվել այն անձանց, որոնք կապ ունեն «Հանրային ձայն» կուսակցության ղեկավարության հետ։

«Ցավոք սրտի, տևական ժամանակ է հայտարարում եմ առերևույթ խախտումների մասին, մասնավորապես՝ անօրինական կալանքների տանելու: Բացառիկ դեպք եղավ, երբ կալանքի տարան մի ամբողջ ընտանիքի, խոսքը Արտակ Գալստյանի ընտանիքի մասին է։ Բազմիցս արձանագրել եմ նախաքննության փուլում աղաղակող խախտումների մասին, որը չի բխում արդարադատության շահերից և բոլորը, ովքեր ուղղակի կամ անուղղակի կապ են ունեցել Վարդան Ղուկասյան գործչի հետ, այսօր բոլորը գտնվում են կալանքի տակ։ Գործերը հարուցվել են քրեական օրենսգրքով նախատեսված հոդվածներով։ Մասնավորապես, Արման Մկրտումյանի եղբորը մեղադրում են շորթում կատարելու մեջ»,- ասաց նա:

Անդրադառնալով Վարդան Ղուկասյանին Հայաստանին արտահանձնելու Քննչական կոմիտեի հայտարարությանը և հարցին, թե որքանով է այն իրատեսական՝ Բաղդասարյանը երկու կարևոր հանգամանք նշեց. «Առաջինը՝ որքանով է իրավաչափ, որ հայտարարվել է միջազգային հետախուզում, այսինքն՝ արդյոք իրավական ընթացակարգը պահպանվել է լիազոր մարմինների կողմից, թե ոչ։ Երկրորդը՝ որքանով է հնարավոր Վարդան Ղուկասյանին արտահանձնելը։ 

Առաջինի դեպքում ցանկանում եմ արձանագրել, որ խափանում կալանքը տրվել է բազմաթիվ կոպտագույն խախտումներով, իմանալով անձի տեղը, հասցեն՝ նրան չեն ծանուցել, որ կա խնդիր և միջնորդություն է արվել գործով ծայրահեղ միջոց կալանքը կիրառելու համար։ Այդ ընթացակարգը չպահպանելու համար իրազեկել ենք միջազգային հարթակներին, այդ թվում այն կառույցին, որը պետք է իրականացնի Ղուկասյանի արտահանձնումը։ Այս հարթության վրա կա խնդիր՝ բխող իրավական հետևանքներով, որն անլուրջ է դարձնում արտահանձնման մեխանիզմը։

Երկրորդը՝ որքանով է հնարավոր այն երկրում, որտեղ ապրում է Վարդան Ղուկասյանը, այդտեղից իրականացնեն արտահանձնում:  Իրավական պրակտիկայում երբևէ նման դեպք չի եղել, հատկապես այն դեպքում, երբ լիազոր մարմինը դա անում է քաղաքական հաշվեհարդարի ենթատեքստում, ինչի ապացույցը Վարդան Ղուկասյանի շրջապատի մարդկանց կալանավորելն ու մահակային քաղաքականություն իրագործելն է»: 

Փաստաբանից հետաքրքրվեցինք՝ ըստ իրեն ո՞րն է նման գործելաոճի նպատակը, արդյոք փորձ է արվում լռեցնել Վարդան Ղուկասյանին: «Կդժվարանամ քաղաքական գնահատական տալ, բայց իրավական գնահատականը սա է. անկախ ենթատեքստից՝ իրավական հարթակում անթույլատրելի են նման գործառույթներ իրականացնելը: Երբ քաղաքականությունն ու դատական համակարգը խառնում են իրար, կործանարար հետևանքներ ենք ունենում»,- եզրափակեց Բաղդասարյանը: