«Հրապարակ». Եթե վաղն Ալիևը գա ու թոշակները 50 հազարով ավելացնի, ծափահարելո՞ւ եք Ալիևին

Հայկական Մամուլ 31 Օգոստոս, 2023 10:53

«Հրապարակի» զրուցակիցը ՀՀԿ ԳՄ անդամ, ալավերդցի Էդուարդ Շարմազանովն է:

- Վարչապետ Նիկոլ Փաշինյանը վերջին օրերին այցելել էր Ձեր հայրենի Լոռու մարզ, մարզպետարանում խորհրդակցություն էր անցկացրել, շրջել Վանաձորում, հանդիպել լոռեցիներին, ծանոթացել մարզի խնդիրներին, եղել մի քանի համայնքներում: Նիկոլ Փաշինյանին Լոռու մարզում բավականին ջերմ ընդունելության են արժանացրել` տատիկ-պապիկները գրկել են, ասել, որ ինքը թոշակները երեք անգամ բարձրացրել է, ասֆալտ է արել եւ այլն: Վերջին օրերին լոռեցիների այս հայտարարություններն են քննարկում համացանցում: Դուք ծնունդով լոռեցի եք: Լոռու մարզում Փաշինյանին իսկապե՞ս սիրում են, թե՞ սա հերթական բեմականացումն էր:

- Բեմականացում էր, թե ոչ, դա ինձ համար երկրորդական է, որովհետեւ կարող են լինել նաեւ մարդիկ, որոնց համար ասֆալտն է ամեն ինչից կարեւորը: Մի կին ասում է, որ ասֆալտն է կարեւոր, ոչինչ, որ ջուր չկա, այդ նույն կինը վաղն էլ կարող է ասել, որ երկիրը տվել են թուրքին, բայց ոչինչ, կարեւորը՝ ասֆալտ կա: Ես մի բան կարող եմ ասել` ազգային մտածողություն ունեցող մարդիկ պետք է համախմբվեն եւ այս կապիտուլյանտ ռեժիմին վռնդեն: Քանի դեռ նա իշխանության է, այս ամենը շարունակվելու է: Ուզում է հարյուր անգամ թոշակ բարձրացնի, դրանից բան չի փոխվում, ինքը կապիտուլյանտ է, որովհետեւ Արցախը ճանաչել է Ադրբեջանի կազմում: Այսօր մենք բարոյական դեգրադացիայի խնդիր ունենք: 120 հազար մեր հայրենակիցներն Արցախում կյանքի ու մահվան կռիվ են տալիս, քո պետության ինքնիշխան տարածքի 150 քառակուսի կիլոմետրն օկուպացված է Ադրբեջանի կողմից, Ադրբեջանն ամեն օր հոխորտում է նոր պատերազմի մասին, իսկ դու որպես վարչապետ ուզում ես ասել, որ քո ֆշտխին չէ, հեչ վեջդ էլ չի, թքած ունես, իգնոր ես անում Արցախի հարցը, եւ քո համար ամենակարեւորն ասֆալտն է: Ով ասֆալտով ու 2 հազար դրամով է ուրախանում, վաղն էլ կարող է Էրդողանն ավելի շատ թոշակ տալ, կարող են գնալ՝ Էրդողանին էլ գրկաբաց ընդունել, էլ ի՞նչ ասենք այդ տեսակի մարդկանց:

- Իսկ ո՞րն է իրավիճակը փոխելու ելքը: Կա՞ տարբերակ:

- Այն, ինչ տեղի է ունենում, փաստում է մեր հասարակության մի զանգվածի արժեքային դեգրադացիայի մասին: Կապ չունի` Լոռի կլինի, Տավուշ թե Սյունիք: Այս իշխանությունները բարոյազրկված են: Նիկոլ Փաշինյանի հենարանը ոչ միայն Ալիեւն ու Էրդողանն են, այլեւ նրանք, ովքեր ասֆալտը հայրենիքից կարեւորում են: Ես նրանց հարց եմ տալիս․ իսկ եթե վաղն Ալիեւը գա ու թոշակները 50 հազար դրամով ավելացնի, ի՞նչ պետք է անեք: Ծափահարելո՞ւ եք Ալիեւին: Գուցե Ալիեւը Նիկոլից ավելի լավ ասֆալտ փռի, այնպես որ՝ Նիկոլը թող չուրախանա այս վիճակից, թող ձեռքը գլխին խփի, թեպետ, եթե սրանք արժեքային համակարգն իմանային ինչ է, 2020 թվականի նոյեմբերի 9-ից հետո ինքնասպան կլինեին: Ես միշտ էլ այն կարծիքին եմ եղել, որ շատը միշտ չի, որ ճիշտ է: Երբեք չեմ կարծել, որ ես էլ պետք է ժողովրդի պես մտածեմ, որովհետեւ Հիսուսին էլ խաչեցին, հետո՞:

- Փողոցային պայքարի միջոցով հնարավո՞ր է այս իշխանությանը հեռացնել:

- Ինձ թվում է՝ միակ ճանապարհը՝ սրանց հեռացնելու, փողոցային պայքարն է:

- Սեպտեմբերի 2-ին Իշխան Սաղաթելյանն ակցիայի է հրավիրում:

- Ամսի 2-ինը ոչ թե փողոցային պայքար է, այլ ակցիա է, որը նվիրված է Արցախի Անկախության տարեդարձին: Մենք պետք է ցույց տանք, որ Հայաստանում բոլորը Նիկոլ չեն եւ ոչ էլ Նիկոլի ասֆալտով հիացած քաղաքացիներ են… Կան մարդիկ, որոնք ապրում են Արցախի դարդուցավով: Հայաստանի ազգային արժեքները մեզ համար առաջնային են, դա պետք է ցույց տալ. հայրենիք, պետություն, ինքնիշխանություն եւ Աստված:

- Մասնակցելո՞ւ եք Արցախին նվիրված ակցիային:

- Միանշանակ, ոչ միայն մասնակցելու եմ, այլեւ կոչ եմ անում բոլորիդ՝ մասնակցել: Ինձ ճանաչող բոլոր մարդիկ, անկախ կուսակցական պատկանելությունից, որոնք կարեւորում են իմ խոսքը, թող մասնակցեն այդ հանրահավաքին՝ իրենց վճռական «այո»-ն ասելով Արցախին ու Արցախի ինքնորոշման իրավունքին: Պետք է «ոչ» ասել Ալիեւին, Էրդողանին եւ Նիկոլին: