Ուզում եմ աջակցություն հայտնել մոլորակի բոլոր «քարտուղարուհիներին». Զախարովան պատասխանել է Ալեն Սիմոնյանին

«Ուզում եմ աջակցություն հայտնել մոլորակի բոլոր «քարտուղարուհիներին»»,-տելեգրամյան իր էջում գրել է ՌԴ ԱԳՆ պաշտոնական ներկայացուցիչ Մարիա Զախարովան՝ ԱԺ նախագահ Ալեն Սիմոնյանի՝ «չեմ պատրաստվում արձագանքել ինչ-որ գերատեսչության ինչ-որ քարտուղարուհու» արտահայտությանն ի պատասխան։

«Դժվար է վիճել այն մասին, որ մակարդակի հետ կապված ակնհայտ խնդիրներ կան։ Եվ ես ուզում եմ աջակցության խոսքեր ասել մոլորակի բոլոր «քարտուղարուհիներին»։ Ընկերուհինե՛ր, ձեր աշխատանքը ոչ թե «քարտուղարուհու», այլ «քարտուղարի», նույնիսկ ամենաբարձր ղեկավարի հաջողության գրավականն է։ Առանց ձեր ամենօրյա տքնաջան աշխատանքի, այդ թվում՝ ժամանակացույցի, հանդիպումների կազմակերպման, փաստաթղթերի հետ աշխատելու, զանգերի ընդունման և միլիոնավոր տարբեր հոգսերի՝ ամեն ինչ ջուրը կընկնի: Մի՛ նեղացեք, այս մարդը, վստահ եմ, առանց մտածելու է «դուրս տվել»։ Նրա խոսքերի պատճառով՝ ձեր վերաբերմունքը մի՛ տարածեք հայ ժողովրդի վրա: Հայ ժողովուրդն իմաստուն է, բազմաչարչար ու սիրառատ»,- գրել է Զախարովան:

Ինչպես հայտնել ենք, Ալեն Սիմոնյանը երեկ մեկնաբանել էր Զախարովայի՝ իր հայտարարությունների՝ «կոպտությանը նմանվող ինչ-որ բան» որակումը՝ ասելով. «Ես չեմ պատրաստվում արձագանքել ինչ-որ գերատեսչության ինչ-որ քարտուղարուհու, որը, կարծում եմ՝ իմ մակարդակը չէ: ԱԳՆ կա դրա համար, արտաքին բաժին կա, թող իրենք արձագանքել: Ես չեմ համարում, որ ես ու ձեր նշած մարմնի բաժնի պետի տեղակալը նույն մարդն ենք, որ ես խոսեմ: Թող ինքն իր դարդերով տապակվի»: