Չպետք է ՀՀ իշխանության կողմից ներմուծված «նախկիների, ներկաների» կեղծ օրակարգը արմատներ գցի Արցախում

«Արտաքին տեսանելի սպառնալիքների հետ մեկտեղ մենք այս օրերին բախվում ենք ներքին, շատ հաճախ արհեստական կամ հորինված փորձությունների:

«Արցախի Ժողովրդավարական Կուսակցություն» խորհրդարանական խմբակցությունն, օգտվելով իր սահմանադրական իրավունքից , հանրապետության նախագահի պաշտոնում առաջադրել է Սամվել Սերգեյի Շահրամանյանի թեկնածությունը: 

Միանգամից նշեմ, որ մենք շարունակում ենք կողմնակից մնալ համապետական ընտրությունների միջոցով իշխանություններ ձևավորելու սկզբունքին:

Ազգային ժողովի կողմից երկրի նախագահի ընտրությունը կարող է հաջողվել միայն մեկ դեպքում, երբ խորհրդարանում ներկայացված քաղաքական ուժերի մեծ մասը համաձայնվում են մեկ թեկնածուի շուրջ: Հակառակ դեպքում մենք կարող ենք հայտնվել տևական շրջապտույտի մեջ, որի ոչ ժամանակը, ոչ էլ շռայլությունը չունենք: Ցավով պետք է արձանագրեմ, որ վերջին շրջանում մեր հանրային-քաղաքական դիսկուրս է մտցվում պառակտիչ ու վնասակար օրակարգ, որի նպատակն է շեղել մեզ  գլխավոր խնդիրներից և խորացնել հանրային տրամադրություններում առկա  հակառակությունները:

Խնդրում և կոչ եմ անում մեր հայրենակիցներին՝ չտրվել նմանօրինակ սադրանքների և մանիպուլյացիաների: Առաջադրված թեկնածուի մասին շրջանառվող կեղծ ու մտացածին տեղեկությունները նպատակ ունեն պառակտել հասարակությունը: Այս բարդ ու պատասխանատու շրջանում բոլորս պարտավոր ենք ցուցաբերել ողջամտություն և գործել իրավիճակին համարժեք:

Մենք չենք կարող թույլ տալ, որ ՀՀ ազգակործան իշխանությունների կողմից ներմուծված «նախկիների ու ներկաների» , «սևերի ու սպիտակների» կեղծ օրակարգը արմատներ գցի Արցախում, իսկ դրանց սերմերը պետք է հեռացվեն Արցախից:

Այս իրավիճակը մենք պետք է հաղթահարենք միասին. ամրացնենք մեր պետական կառույցը՝ հայկական Արցախի համար համազգային պայքարը շարունակելու մտադրությամբ և ոչ մեկին չթողնենք թուլացնել մեր դիմադրողականությունն ու զգոնությունը»։