Կինը սիրելիի հետ ճանապարհորդելիս հանդիպել է իր ապագա ամուսնուն

Ամերիկյան Միչիգան ​​նահանգի բնակչուհին զուգընկերոջ հետ ճանապարհորդելիս հանդիպել է իր ապագա ամուսնուն և նրա հետ տեղափոխվել Մեծ Բրիտանիա։ Այս մասին հայտնում է Daily Express US-ը։

28-ամյա Կարան ծանոթացել է բրիտանացի Ջեյմսի հետ 2016 թվականին, երբ հանգստանում էր Ֆլորիդայի Պանամա Սիթի Բիչ առողջարանային քաղաքում։ Նա հանգստի էր գնացել սիրելիի և նրա ընկերոջ հետ։ Մի օր Ջեյմսը և նրա եղբայրը մոտեցել են աղջկան ակումբում և խնդրել նրան լավ ռեստորան խորհուրդ տալ։ Աղջկա խոսքով՝ ինքն անմիջապես անբացատրելի կապ է զգացել տղամարդու հետ։ «Առաջին բանը, որ  նկատեցի, Ջեյմսի ժպիտն էր, իսկ հետո նրա աչքերը։ Չեմ ստի։ Մտածեցի, որ նրա պատճառով անախորժություններ են լինելու։ Բայց մեր միջև ինչ-որ բան կար։ Ես նույնիսկ չեմ կարող դա բացատրել», - հիշել է նա:

Ավելի ուշ Ջեյմսը Կարային և նրա ընկերոջը հրավիրել է միասին զվարճանալու։ Աղջիկը ողջ երեկոն անցկացրել է տղամարդու և նրա ընկերների հետ։ Նա պարզել է, որ Ջեյմսի հետ շատ ընդհանուր հետաքրքրություններ ունի և նրա հետ փոխանակվել է կոնտակտային տվյալներով։ Աղջկա ընկերոջը դա դուր չի եկել, եւ զույգը վիճել է։ Երբ Կարան տուն է վերադարձել, զուգընկերոջ հետ հարաբերություններն էլ ավելի են վատացել, և ի վերջո որոշել են բաժանվել։

Հաջորդ երեք ամիսների ընթացքում նա տեսազրույց է ունեցել Ջեյմսի հետ և սկսել է ավելի մտերմանալ նրա հետ: 2016 թվականի մայիսին տղամարդը եկել է աղջկա մոտ՝ ԱՄՆ, իսկ հուլիսին նա գնացել է նրա մոտ՝ Մեծ Բրիտանիա, որտեղ անցկացրել է մի ամբողջ ամիս։ Մի օր Ջեյմսը Կարային տարել է ծովափնյա ակումբ, որտեղ հանդիպել էին առաջին անգամ և ամուսնության առաջարկ արել։

Սիրահարներն ամուսնացել են 2016 թվականի հոկտեմբերին, իսկ դեկտեմբերին Կարան տեղափոխվել է Մեծ Բրիտանիա։ Աղջիկը պատմել է, որ ամուսինն ամբողջությամբ փոխել է իր կյանքը և մարդկանց հորդորել է հետևել իրենց ինտուիցիային։