Չենք մոռանա և չենք ների. Իսրայելը «պերսոնա նոն գրատա» է հայտարարել Բրազիլիայի նախագահին

Իսրայելի արտաքին գործերի նախարար Իսրայել Կացը երկուշաբթի օրը Բրազիլիայի նախագահ Լուիս Ինասիու Լուլա դա Սիլվային «պերսոնա նոն գրատա» է հայտարարել Գազայի հատվածում պաղեստինցիների հետ կատարվողը ցեղասպանություն անվանելու համար, գրում է Interfax-ը։

«Մենք չենք մոռանա և չենք ների: Սա լուրջ հակասեմական հայտարարություն է: Իմ անունից և Իսրայելի պետության քաղաքացիների անունից տեղեկացնում եմ նախագահ Լուլային, որ նրան չեն ընդունի Իսրայելում, քանի դեռ նա չի հրաժարվել իր խոսքերից», - Կացի խոսքերը մեջբերում է իսրայելական հեռուստաալիքը:

Հեռուստաալիքը նշում է, որ նախարարն այս որոշումը ներկայացրել է Բրազիլիայի դեսպան Ֆեդերիկո Մայերի ուշադրությանը։

«Համասի դեմ Իսրայելի արդար պատերազմը Հիտլերի և նացիստների վայրագությունների հետ համեմատելը խայտառակություն է և լուրջ հակասեմական հարձակում», - հավելել է Կացը:

Նախօրեին Բրազիլիայի նախագահը Գազայում տեղի ունեցողը անվանել էր ցեղասպանություն պաղեստինցի ժողովրդի դեմ։

Նա նաև ասել է, որ սխալ է համարում արևմտյան երկրների կողմից Մերձավոր Արևելքում ՄԱԿ-ի գործակալության ֆինանսավորումը և պաղեստինցի փախստականներին օգնելու դադարեցումը։ Լուլա դա Սիլվան ընդգծել է, որ անհրաժեշտ է պահպանել մարդասիրական օգնությունը Գազայի հատվածում խաղաղ բնակիչների համար։

Իսրայելը կտրուկ է արձագանքել այս հայտարարություններին։ Իսրայելի վարչապետ Բենիամին Նեթանյահուն հայտարարել է, որ Բրազիլիայի նախագահը «հատել է կարմիր գիծը»։