Զելենսկին և Միշելը քննարկում են ունեցել
Աշխարհ
Ուկրաինայի նախագահ Վոլոդիմիր Զելենսկին և Եվրոպական խորհրդի նախագահ Շառլ Միշելը քննարկել են իրավիճակը լեհ-ուկրաինական սահմանին, որը լեհ ֆերմերները շարունակում են շրջափակված պահել։ Այս մասին հայտնել են Ուկրաինայի նախագահի գրասենյակից։
«Կողմերը քննարկել են ուկրաինալեհական սահմանին տիրող իրավիճակը։ Վոլոդիմիր Զելենսկին ընդգծել է, որ Ուկրաինան պատրաստ է խորհրդակցությունների՝ իրավիճակը արագ և արդարացիորեն կարգավորելու համար»,- ասվում է գրասենյակի կայքում հրապարակված հաղորդագրության մեջ։
Զելենսկին նաև ընդգծել է Ուկրաինայի և ԵՄ-ի միջև առևտրի ազատականացման ռեժիմը շարունակելու անհրաժեշտությունը։ Նա կարծում է, որ ռազմական գործողությունների ժամանակ նման աջակցությունը պակաս կարևոր չէ, քան զենքի մատակարարումը։
Փետրվարի 20-ին լեհ ֆերմերները բողոքի ակցիա են անցկացրել Լեհաստանի 180 վայրերում: Ֆերմերները գյուղտեխնիկա են տեղակայել ճանապարհներին, ինչպես նաև երկրի մի քանի խոշոր քաղաքների փողոցներում։ Ցուցարարներն ամբողջությամբ արգելափակել են բեռնատարների անցումը Ուկրաինայի հետ սահմանի անցակետերով, իսկ երեք անցակետերում այլ տեսակի տրանսպորտ չի թույլատրվում անցնել։ Մեդիկայի անցակետի մոտ ցուցարարները թափել են հացահատիկը գնացքի վագոններից։
Լեհ ֆերմերների ցույցերը սկսվել են դեռ փետրվարի 9-ից։ Նրանք պահանջում են սահմանափակել կամ ամբողջությամբ արգելել էժան գյուղատնտեսական արտադրանքի ներմուծումն Ուկրաինայից, ուժեղացնել օժանդակությունն ազգային անասնաբուծությանը, ինչպես նաև անհամաձայնություն են հայտնում Եվրամիության «Կանաչ ուղեգիծ» ռազմավարությանը, որը նախատեսում է մինչև 2050 թվականը զրոյական ածխածնային արտանետումներ: Բողոքի ակցիային աջակցում է Լեհաստանի գյուղատնտեսության նախարարության ղեկավարությունը։
Փետրվարի 27-ին լեհ ֆերմերները կկազմակերպեն «երթ դեպի Վարշավա», որին կմիանան նրանց գործընկերները ԵՄ այլ երկրներից:
Ամենադիտված 
Մնաս բարյավ. Րաֆֆի Հովհաննիսյան
