Գերմանացի երեք լողորդուհի հիվանդացել է Օլիմպիական խաղերում Սենում հանդես գալուց հետ

Գերմանացի երեք լողորդուհի հիվանդացել է Փարիզի Օլիմպիական խաղերում բացօթյա ջրում մրցումներին մասնակցելուց հետո, թեև դեռևս հայտնի չէ՝ արդյո՞ք վաղուց աղտոտված Սեն գետն է եղել նրանց հիվանդության պատճառը։

Գերմանական օլիմպիական սպորտի կոնֆեդերացիայի կողմից շաբաթ օրը հրապարակված հայտարարության մեջ լողորդուհիների անունները չեն նշվում, թեև մարզուհի Լեոնի Բեկը սոցիալական ցանցերում գրառում է կատարել իր վիճակի մասին: Երեք լողորդուհիներն էլ ապաքինվել են և նախատեսվում է, որ տուն կվերադառնան, ինչպես նախատեսված էլ:

Բեկը, որը 10 կմ տարածության մրցումներում 9-րդն էր, Instagram-ում բթամատը վեր պարզած իր լուսանկարն է հրապարակել, բայց հիվանդ տեսք ունի:

«Երեկ ես 9 անգամ փսխեցի + փորլուծություն»,- գրել է նա, իսկ հետո հեգնանքով հավելել. «Սենայի ջրի որակը հավանության է արժանացել»։

Գերմանական կոմիտեի հայտարարության մեջ ասվում է, որ իր մարզիկներից երեքը հիվանդացել են:

«Երկու գերմանացի լողորդուհի ուրբաթ  հոսպիտալացվել է սրտխառնոցի, փսխման և փորլուծության պատճառով։ Այսօր առավոտից նրանք իրենց շատ ավելի լավ են զգում,- ասվում է հաղորդման մեջ:- Նման ախտանիշներով ևս մեկ լողորդուհի այժմ բուժվում է գերմանական թիմի բժիշկների մոտ»:

Վաղուց աղտոտված Սենի հետ կապված մտահոգությունները, որտեղ լողալն արգելված է ավելի քան մեկ դար, քանի որ ջուրը հագեցած է բակտերիաներով, ի հայտ եկան այն բանից հետո, երբ Փարիզի կազմակերպիչները հայտարարեցին, որ մտադիր են լողի մրցումներն անցկացնել ֆրանսիական մայրաքաղաքի սրտով հոսող հայտնի գետում։