Ուկրաինական զորքերի ներխուժումից հետո Կուրսկի շրջանում առնվազն 200 մարդ է կորել
Քաղաքական
Ռուսաստանի Կուրսկի շրջանի բնակիչներն իրենց հարազատներին են փնտրում այն բնակավայրերում, որոնք գտնվում են ուկրաինական զորքերի և ռուսաստանյան բանակի մարտերի գոտում։ Առնվազն 200 մարդ դիմել է Lisa Alert որոնողական ջոկատին, կորած հարազատների մասին մյուս հայտարարությունները հայտնվել են «ВКонтакте» սոցիալական ցանցում, գրում է «Агентство»-ն։
Կուրսկի շրջանի «Lisa Alert»-ի տարածքային գրասենյակի պատին փակցված է 71 հայտարարություն՝ Սուջայի և Կորենևի շրջաններից, ինչպես նաև հենց Կուրսկից մարդկանց որոնման մասին, որոնք եղել են մարտական գործողությունների գոտում, բայց նրանց հետ կապը կտրվել է։ Կազմակերպությանն ուղղված հարցումների թիվը շատ ավելի մեծ է:
«Մենք պատրաստ չենք ստույգ թիվ ասելլ, քանի որ դեռևս վիճակագրություն չկա, բայց վերջին երկու-երեք օրվա ընթացքում վստահորեն մոտեցել ենք 200 դիմումի թվին»,- ասել է կազմակերպության տարածաշրջանային մասնաճյուղի մամուլի քարտուղար Օլեսյա Պարտալյուկը։ Ըստ նրա, «Lisa Alert»-ը որոնման հայտարարություններ է հրապարակում միայն այն մարդկանց համար, որոնց հարազատները օգնություն են խնդրել։
«Չեմ կարող ասել, որ մենք բոլոր անհայտ կորածների մասին գիտենք։ Կարծում եմ՝ նրանց թիվը շատ ավելի մեծ է»,- ընդգծել է նա։
Կորած բնակիչներին փնտրում են նաև «ВКонтакте» սոցիալական ցանցում տեղական համայնքների միջոցով։ Այսպես, անցած ուրբաթ երեկոյից միայն «Подслушано Суджа» հարթակում օգտատերերը հրապարակել են հաղորդագրություններ 148 մարդու որոնման մասին։ Մերձավորներին և ծանոթներին գտնելու խնդրանքով հաղորդագրությունները սկսել են հայտնվել չորեքշաբթի օրը՝ օգոստոսի 7-ին՝ Ուկրաինայի զինված ուժերի հարձակման երկրորդ օրը:
Անցած ուրբաթ օրը Կուրսկի շրջանի Սուջայի շրջանի բնակիչները նախագահ Վլադիմիր Պուտինից օգնություն են խնդրել ուկրաինական բանակի շարունակվող հարձակման պատճառով։
Տեսաուղերձում նրանք նշել են, որ «մնացել են երեխաների հետ, առանց կացարանի, վճարների և փողի», հաղորդում է The Moscow Times-ը։
Բնակչուհիներից մեկը հայտնել է, որ տարածքից տարհանում չի եղել, և նրանք, ովքեր կարողացել են հեռանալ, կապի բացակայության պատճառով չեն կարողանում իմանալ, թե ինչ է կատարվում նրանց հետ, ովքեր մնացել են։ Ըստ նրա, Գուևո գյուղում մարդիկ «պոկված են հողից», ստիպված են նավակներով անցնել գետը, վազել անտառներով ու ճահիճներով, որտեղ «նրանց վրա կրակում են»։
Նախօրեին Ռուսաստանի Ազգային հակաահաբեկչական կոմիտեն հայտարարել էր երեք սահմանամերձ շրջաններում «հակահաբեկչական գործողության» ռեժիմ մտցնելու մասին՝ Ուկրաինայի շարունակվող հարձակման պատճառով։
«Որոշում է կայացվել 2024 թվականի օգոստոսի 9-ից Բելգորոդի, Բրյանսկի և Կուրսկի շրջաններում հակաահաբեկչական գործողություններ կազմակերպել»,- հայտնել են կոմիտեից։
Ուկրաինայի զինված ուժերը Կուրսկի շրջանում սկսել են առաջխաղացումը օգոստոսի 6-ի առավոտյան։ Ընդամենը մի քանի օրվա մարտերի ընթացքում ուկրաինական բանակը վերահսկողության տակ է վերցրել առնվազն 20 բնակավայր և Սուջայի գազաչափ կայանը, որով ռուսաստանյան գազը մղվում է Եվրոպա։ Տասնյակ ռուսաստանցի զինվորականներ, այդ թվում՝ ժամկետային զինծառայողներ, գերեվարվել են։ Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը հայտարարել է, որ գործողությունը, որի արդյունքում Ռուսաստանը կկորցնի տարածքներ, մարդիկ և տեխնիկա, կամրապնդի Կիևի դիրքերը Մոսկվայի հետ ապագա բանակցություններում։
Ռուսաստանի հետախուզությունը երկու շաբաթ առաջ գիտեր Ուկրաինայի՝ Կուրսկի շրջան մոտալուտ ներխուժման մասին, սակայն երկրի ռազմական ղեկավարությունը, այդ թվում՝ Գերասիմովը, անտեսել է այդ տեղեկությունը, հաղորդում է Bloomberg-ը՝ հղում անելով Կրեմլի աղբյուրին։
Պաշտոնական տվյալներով, տարածաշրջանում տեղի ունեցած մարտերի հետևանքով տուժել է առնվազն 66 մարդ, այդ թվում՝ ինը երեխա։ Փոխնահանգապետ Անդրեյ Բելոստոցկին խոսել է չորս զոհի մասին։
ՈՒՂԻՂ ԵԹԵՐ
Ամենադիտված 
Կորուստ՝ Ալլա Լևոնյանի ընտանիքում
