Իրանն ագրեսորներին պատասխանելու իրավունք ունի. Փեզեշքիան

Թեհրանը ողջունում է բոլոր երկրների հետ փոխգործակցությունը, սակայն չի ենթարկվի ճնշումների և, միջազգային դրույթների համաձայն, իրավունք ունի պատասխանելու ագրեսորներին։ Այս մասին Գերմանիայի կանցլեր Օլաֆ Շոլցի հետ հեռախոսազրույցի ժամանակ ասել է Իրանի նախագահ Մասուդ Փեզեշքիանը։

«Ողջունելով բոլոր երկրների հետ փոխգործակցության զարգացումը և ընդգծելով խնդիրները բանակցությունների միջոցով լուծելու անհրաժեշտությունը՝ Իրանը երբեք չի ենթարկվի ճնշման, պատժամիջոցների, հարկադրանքի և ագրեսիայի։ Ավելին, միջազգային դրույթների համաձայն, իր իրավունքն է համարում՝ պատասխանելու ագրեսորներին»,- ասվում է Իրանի նախագահի պաշտոնական կայքում։

Հուլիսի վերջին պաղեստինյան ՀԱՄԱՍ շարժման քաղբյուրոյի ղեկավար Իսմայիլ Հանիեն սպանվել էր Թեհրանում գտնվող իր նստավայրին իսրայելական հարվածի արդյունքում, ուր նա ժամանել էր՝ Իրանի նոր նախագահի երդմնակալությանը մասնակցելու։ Շարժումը Հանիեի մահվան մեջ մեղադրեց Իսրայելին ու ԱՄՆ-ին և ասաց, որ հարձակումն անպատասխան չի մնա: Իսրայելի պաշտոնյաները հայտարարել են, որ իրենք մեկնաբանություններ չունեն Հանիեի սպանության վերաբերյալ: «ԱՄՆ-ն ներգրավված չէ ՀԱՄԱՍ-ի քաղբյուրոյի ղեկավարի մահվան մեջ»,-ավելի ուշ հայտարարել է ՄԱԿ-ում Միացյալ Նահանգների մշտական ​​ներկայացուցչի տեղակալ Ռոբերտ Վուդը։