Մոսկվայի «Ռիո» առևտրի կենտրոնում խոշոր հրդեհ է բռնկվել

Մոսկվայի Բոլշայա Չերյոմուշկինսկայա փողոցում գտնվող «Ռիո» առևտրի կենտրոնում օգոստոսի 14-ի առավոտյան հրդեհ է բռնկվել, հայտնում է ՌԴ ԱԻՆ հեռագրային ալիքը։ РБК-ն գրում է, որ չորս հարկանի շենքի մի քանի հարկ այրվել է։ Ըստ ԱԻՆ-ի նախնական տեղեկությունների՝ զոհեր և վիրավորներ չկան։

Ինչպես հայտնում է Baza հեռագրային ալիքը, հրդեհը սկսվել է ֆիթնես կենտրոնի տարածքում։ Ականատեսների կադրերում երևում է թանձր սև ծուխը։ Նախնական տվյալներով՝ բոլոր մարդիկ դուրս են բերվել առևտրի կենտրոնից։ Baza-ն հայտարարել է, որ ավիացիան պատրաստվում է հրդեհը մարելու համար, սակայն Արտակարգ իրավիճակների նախարարությունը հերքել է դա։ «Ավիացիա ներգրավելու կարիք չկա»,-ասվում է հաղորդագրության մեջ։

ՌԴ ԱԻՆ-ը հայտնել է, որ հրշեջ-փրկարարները տեղայնացրել են հրդեհը, և մարումը շարունակվում է։