Դասագրքի 82-րդ էջում Արևելյան Հայաստանի Ռուսաստանին միացումը համարվում է «բռնակցում»․ պատմաբան Էդգար Հովհաննիսյան

Հայաստանի պետական մանկավարժական համալսարանի պատմության և իրավագիտության ֆակուլտետի դեկան, պատմաբան Էդգար Հովհաննիսյանը գրել է․

«Պատմության խեղաթյուրու՞մ թե՞ քաղաքականացված պատմություն․

Օրերս հայտնի դարձավ, որ հերթական ոդիսականից հետո երաշխավորում է ստացել հանրակրթական դպրոցի 8֊րդ դասարանի «Հայոց պատմության» դասագիրքը, որը կրկին հրատարակության է պատրաստել տխրահռչակ «Մասնակցային դպրոցը»։

Այս դասագրքի 82֊րդ էջում Արևելյան Հայաստանի Ռուսաստանին միացումը համարվում է «բռնակցում»։

Հայտնի է, որ այդ ժամանակաշրջանում` 19֊րդ դարի սկզբներին, Արևելյան Հայաստանի տարածքում, ցավոք սրտի, գոյություն չուներ որևէ հայկական անկախ կամ կիսանկախ պետական կազմավորում։ Այդ պարագայում, անշուշտ բռնակցում/անեքսիա եզրույթի կիրառումը բացարձակ տեղին կլիներ։

Երկու կայսրությունների միջև մղված պատերազմներում որևէ տարածքի մեկից մյուսին անցնելը բռնակցում կարող է ընկալվել միայն պարտվող կայսրության տեսանկյունից։ Իսկ հայկական տեսանկյունից երևույթի նման մեկնաբանումը պատմական իրողությունների խեղաթյուրման կամ ներկա աշխարհաքաղաքական քամիների ազդեցության արդյունք է։

Հաճախ ենք լսել, որ պատմությունը քաղաքական գիտություն է, սակայն ծայրահեղ քաղաքականացված պատմության ուսուցումը կապ չունի ոչ միայն գիտության, այլ նաև վտանգավոր է կրթության տեսանկյունից։

Միայն պատմության օբյեկտիվ ներկայացումը կարող է լիարժեքորեն կատարել իր կրթական ու դաստիարակչական առաքելությունը»։