Ջրհեղեղից հետո Քարկոփում պտղատու ծառերը չորանում են․ գյուղում անցուդարձը կազմակերպում են ժամանակավոր հետիոտնային կամրջով

Լոռու մարզի Ախթալայի նոր ժամանակավոր կամրջի կառուցման աշխատանքներով պայմանավորված այսօրվանից մինչև օգոստոսի 23-ը ժամը 08:00 փակ է լինելու դեպի Ալավերդի համայնքի Ախթալա, Շամլուղ, Քարկոփ, Մեծ Այրում, Փոքր Այրում, Ճոճկան, Բենդիկ բնակավայրեր տանող ավտոճանապարհը։ MediaHub-ը կապ է հաստատել Քարկոփի վարչական ղեկավարի հետ։

Հերմինե Պետրոսյանն ասել է, որ գյուղը նորից հայտնվել է բլոկադայի մեջ, անցուդարձը կազմակերպում են Քարկոփի ժամանակավոր հետիոտնային կամրջով։

«Բերքը հասունացել է ու բերքահավաքի շրջան է։ Սա լրացուցիչ անհարմարություններ է ստեղծում բնակիչների համար, քանի որ այգիների մի մասը գտնվում է գետի մյուս կողում և մարդիկ ստիպված այն կազմակերպում են ոտքով։ Բացի դա, գնալով ավելի շատ է երևում ջրհեղեղի վնասները։ Պտղատու ծառերի մեծ մասը չորանում է»,- ասաց Պետրոսյանը:

Ժամանակավոր կամրջի շինարարությանը զուգահեռ՝ աղետի գոտում պատրաստվել են, որ անհրաժեշտության դեպքում կազմակերպեն շտապ բժշկական օգնություն։ Աղետից մեծապես տուժած Քարկոփ գյուղում սկսվել է դպրոցի վերանորոգման աշխատանքը։ Վարչական ղեկավարի խոսքով սակայն, նոր ուսումնական տարին կմեկնարկի մանկապարտեզի շենքում՝ 2 հերթափոխով։

«Մի քիչ անհարմար կլինի, բայց պետք է դիմանանք։ Գյուղի հիմնական կամրջի, կոյուղագծերի, բնակելի տների և մյուս ենթակառուցվածքների նախագծերը պատրաստ են։ Բայց, միայն բնակելի տների վերանորոգումն են գյուղացիները սկսել, մյուսներից դեռ նորություն չկա»,- ասել է նա։

Մենք հետաքրքրվեցինք նաև պետության հատկացրած աջակցություններից, որին ի պատասխան Քարկոփի վարչական ղեկավարն ասաց, որ բնակիչները գոհ են, հատկացված գումարը կհերիքի վերացնել աղետի թողած հետքերը։