Բայդենը Նեթանյահուին կոչ է արել համաձայնության գալ ՀԱՄԱՍ-ի հետ

ԱՄՆ նախագահ Ջո Բայդենը Իսրայելի վարչապետ Բենիամին Նեթանյահուին կոչ է արել Գազայի հատվածում հրադադարի հասնել ՀԱՄԱՍ-ի հետ, քանի որ հրադադարի շուրջ բանակցությունները փակուղի են մտել, գրում է VOA-ն:

ԱՄՆ-ի և Իսրայելի ղեկավարները հեռախոսազրույց են ունեցել պետքարտուղար Էնթոնի Բլինկենի մերձավորարևելյան շրջագայությունից ժամեր անց, որի նպատակն էր համաձայնության հասնել տարածաշրջանում աճող լարվածության պայմաններում:

Բայդենն ասել է, որ «հստակ հասկացրել է՝ պետք է ստորագրեն հրադադարի և պատանդների ազատ արձակման համաձայնագիր»: Բացի այդ, Բայդենը Նեթանյահուի հետ քննարկել է «գալիք բանակցությունները Կահիրեում՝ մնացած խոչընդոտները վերացնելու համար»։

Նա նաև տեղեկացրել է Նեթանյահուին «Իրանի և նրա արբանյակային ահաբեկչական խմբավորումների դեմ Իսրայելի պաշտպանությանն աջակցելու ԱՄՆ ջանքերի մասին» այն բանից հետո, երբ Թեհրանը սպառնացել է հաշվեհարդար տեսնել Թեհրանում ՀԱՄԱՍ-ի բարձրաստիճան ղեկավարի սպանության համար:

Սպիտակ տունը հայտնել է, որ ԱՄՆ նախագահը «ընդգծել է համաձայնության հասնելու հրատապությունը»։

Ավելի վաղ Axios լրատվական գործակալությունը հայտնել էր, որ Բայդենը մտադիր է ճնշում գործադրել Նեթանյահուի վրա՝ բանակցություններում ճկունություն ցուցաբերելու համար, որոնք ընթանում են ԱՄՆ-ի, Եգիպտոսի և Քաթարի միջնորդությամբ։