«Սասնա ծռեր» էպոսը ՅՈՒՆԵՍԿՕ-ի օրակարգում է

Դեկտեմբերի 3-ին ՅՈՒՆԵՍԿՕ-ի գլխավոր գրասենյակում կայացել է ոչ նյութական մշակութային ժառանգության պահպանմանը նվիրված միջկառավարական հանձնաժողովի 7-րդ նիստի պաշտոնական բացումը, հաղորդում է ՅՈՒՆԵՍԿՕ-ի պաշտոնական կայքը:

Հիշեցնենք, որ հայկական «Սասնա ծռեր» էպոսը ևս օրակարգում է, այն ՅՈՒՆԵՍԿՕ-ի մարդկության ոչ նյութական մշակութային ժառանգության ներկայացուցչական ցուցակում ընդգրկվող թեկնածուներից է:

Ոչ նյութական մշակութային ժառանգությունն իր մեջ ներառում է սերնդից սերունդ փոխանցվող արվեստի ավանդույթներ և ձևեր, այդ թվում՝ բանավոր ավանդույթներ, կատարողական արվեստ, հասարակական արարողություններ, տոնական և պաշտամունքային ծիսակարգեր, գիտելիքներ և ներկայացումներ, որոնք առնչվում են բնությանը և տիեզերքին, ինչպես նաև ավանդական արհեստների տեխնիկային:

Միջկառավարական հանձնաժողովը քննարկել է ոչ նյութական մշակութային ժառանգության պահպանման ցուցակում 60 թեկնածություններն ընդգրկելու հարցը:

Հանձնաժողովի եզրափակիչ նիստը կայանալու է դեկտեմբերի 7-ին:

Նիստի մասնակիցները քննարկել են հրատապ պաշտպանության կարիք ունեցող ոչ մշակութային ժառանգության ցուցակում 8 թեկնածությունների ընդգրկման հարցը, որը կոչված է օգնություն և աջակցություն ցուցաբերել միջազգային աջակցությանը վտանգի մեջ հայտնված մշակույթի տարրերի պահպանման հարցերում:

Բացի այդ հանձնաժողովի անդամները քննարկել են մարդկության ոչ նյութական մշակութային ժառանգության ներկայացուցչական ցուցակի մեջ 36 թեկնածությունների հարցը:

Այսօրվա դրությամբ հրատապ պաշտպանության կարիք ունեցող ոչ նյութական մշակութային ժառանգության ցուցակն ունի 15 երկրի պատկանող 27 տարրեր:

Մարդկության ոչ նյութական մշակութային ժառանգության ներկայացուցչական ցուցակն ընդգրկում է 86 երկրների կողմից ներկայացված 232 տարրեր:

Հավելենք, որ ոչ նյութական մշակութային ժառանգության ցուցակում թեկնածություն առաջադրելու իրավունք ունեն միայն այն երկրները, որոնք վավերացրել են ոչ նյութական մշակութային ժառանգության պահպանման մասին կոնվենցիան, որն ընդունվել է ՅՈՒՆԵՍԿՕ-ի Գլխավոր համաժողովի կողմից 2003թ.: Այսօրվա դրությամբ 146 երկրներ են վավերացրել կոնվենցիան:

Ավելացնենք, որ թեկնածուները կգնահատվեն դեկտեկմբերի 3-ից 7-ը, իսկ հաղթողների անունները կհայտարարվեն ամեն օրվա վերջում: