«Սասնա ծռեր»-ը՝ ՅՈՒՆԵՍԿՕ-ի մշակութային ժառանգության ցուցակում

ՅՈՒՆԵՍԿՕ-ի գլխավոր գրասենյակում կայացած ոչ նյութական մշակութային ժառանգության պահպանմանը նվիրված միջկառավարական հանձնաժողովի 7-րդ նիստի 3-րդ օրը՝ դեկտեմբերի 5-ին ընդունած որոշմամբ՝ հայկական «Սասնա ծռեր» էպոսը ևս ընդգրկվել է ՅՈՒՆԵՍԿՕ-ի մարդկության ոչ նյութական մշակութային ժառանգության ներկայացուցչական ցուցակում. հաղորդում է ՅՈՒՆԵՍԿՕ-ի պաշտոնական կայքը:

«Հայկական ավանդական «Սասնա ծռեր» կամ «Սասունցի Դավիթ» էպոսը պատմում է մի երիտասարդի՝ Սասունցի Դավթի մասին, ով պաշտպանում է իր հայրենիքը չարի դեմ անհավասար պայքարում: Հերոսական էպոսը պատմել ու երգել են բաժին առ բաժին քնարական ձայնով և ռիթմիկ առոգանությամբ: Այն սովորաբար ներկայացվել է նստած վիճակում դուդուկի երաժշտական ուղեկցությամբ հարսանիքների, ծնունդների, կնունքների և կարևոր ազգային մշակութային միջոցառումների ժամանակ:

Գոյություն ունեն 160 տարբերակներ, և ներկայացումները կարող են տևել մինչև 2 ժամ», գրված է է ՅՈՒՆԵՍԿՕ-ի պաշտոնական կայքում:

Հետաքրքիրն այն է, որ հայկական էպոսի հետ այդ ցուցակում են ընդգրկվել նաև այլ երեք տարրեր, այդ թվում այսպես ասած Ադրբեջանի «թառը», որի ներկայացման և վարպետության արվեստը, ըստ  ՅՈՒՆԵՍԿՕ-ի, լայնորեն տարածում ունի Ադրբեջանում:

Ոչ նյութական մշակութային ժառանգությունն իր մեջ ներառում է սերնդից սերունդ փոխանցվող արվեստի ավանդույթներ և ձևեր, այդ թվում՝ բանավոր ավանդույթներ, կատարողական արվեստ, հասարակական արարողություններ, տոնական և պաշտամունքային ծիսակարգեր, գիտելիքներ և ներկայացումներ, որոնք առնչվում են բնության և տիեզերքի հետ, ինչպես նաև ավանդական արհեստների տեխնիկային:

Մարդկության ոչ նյութական մշակութային ժառանգության ներկայացուցչական ցուցակն ընդգրկում է 86 երկրների կողմից ներկայացված 232 տարրեր:

Հավելենք, որ ոչ նյութական մշակութային ժառանգության ցուցակում թեկնածություն առաջադրելու իրավունք ունեն միայն այն երկրները, որոնք վավերացրել են ոչ նյութական մշակութային ժառանգության պահպանման մասին կոնվենցիան, որն ընդունվել է ՅՈՒՆԵՍԿՕ-ի Գլխավոր համաժողովի կողմից 2003թ.: Այսօրվա դրությամբ 146 երկրներ են վավերացրել կոնվենցիան:

Հանձնաժողովի եզրափակիչ նիստը կայանալու է դեկտեմբերի 7-ին: