ՍԴ-ն, այս որոշմամբ, փորձել է խեղաթյուրել, մանիպուլյացիայի ենթարկել և մոլորության մեջ դնել հայ հանրությանը․ Արծվիկ Մինասյան

Ակնհայտ է, որ ՍԴ-ն այս որոշմամբ փորձել է խեղաթյուրել, մանիպուլյացիայի ենթարկել և մոլորության մեջ դնել հայ հանրությանը՝ փորձելով արհեստական հակասություն ձևակերել անկախության հռչակագրի և ՀՀ սահմանադրության միջև։ Այդ արհեսատական հակասությունն էլ ձևակերպել է գեղարվեստական արտահայտությամբ՝ իբրև՝  սեփական զավակին խժռող ծնողի կոնցեպն է բերում օրինակ։ Չի կարող լինել այդպիսի բան, Հայաստանի Հանրապետության պետականության ծնունդն արձանագրող անկախության հռչակագիրը չի կարող որևէ ձևով հակասել ՀՀ սահմանադրությանը։ Այս մասին, այսօր՝ հոկտեմբերի 1-ին, լրագրողների հետ ճեպազրույցում ասաց ԱԺ «Հայաստան» խմբակցության քարտուղար Արծվիկ Մինասյանը։

«ՍԴ-ն իր որոշման վերջին հատվածում անդրադառնում է հանրաքվեին, բայց առանց նշելու, որ այս փաստաթուղթը (սահմանազատման հանձնաժողովների կանոնակարգը-խմբ) պետք է լինի, անգամ՝ չի մանրամասնում, որ արձանագրությունները՝ սահմանների նկարագրության և այլն, առնվազն պետք է գնային հանրաքվեի։ ՍԴ-ն քողարկել է այն զիջումները, որոնք առաջիկայում պատրաստվում են կամ հնարավոր է, որ ներկայացնեն Հայաստանին»,- նշեց Մինասյանը։ 

Արդյո՞ք սա կապում է ՄԱԿ-ում Փաշինյանի՝ Էրդողանի հետ հանդիպման հետ՝ հարցին ի պատասխան Մինասյանը նշեց, որ կդժվարանա ասել կապ կա, թե՝ ոչ, բայց այն, ինչ ասել է Փաշինյանը, թե եթե հակասի, ապա Սահմանադրություն կփոխենք, դա ոչ միայն խայտառակություն է, այլև՝ միջազգային մակարդակում արժանապատվության նսեմացման բարձրագույն կետ է։

«Արդյո՞ք սա կարելի է դիտել որպես այնպիսի քայլ, որն անվերադարձ կամ անդառնալի կորուստ է բերելու Հայաստանին, իմ խորին համոզմամբ՝ ոչ, որովհետև իշխանափոխությունից հետո այս ամենն իրենց գնահատականը ստանալու է, այդ թվում՝ միջազգային քրեական արդարադատության շրջանակներում, բոլորը կանգնելու են պատասխանատվության առաջ»,- ասաց Մինասյանը։