Ուկրաինայում հարգել են Սպիտակի երկրաշարժի զոհերի հիշատակը

Ուկրաինայում այսօր բոլոր եկեղեցիներում և մատուռներում կայացել են Սպիտակի զոհերի հիշատակին նվիրված արարողություններ. այս մասին հաղորդում է analitika.at.ua-ն:

Կիևում հիշատակի արարողությունը տեղի է ունեցել մատուռում, որը տեղեկայված է եկեղեցու՝ շինարարության համար քաղաքային իշխանությունների կողմից տրամադրված տարածքում:

Սպիտակի երկրաշարժի զոհերի հիշատակին նվիրված արարողությանը մասնակցում էին հայկական սփյուռքի ներկայացուցիչներ, հյուրեր և մայրաքաղաքի բնակիչներ:

Հիշեցնենք, որ 1988-ի դեկտեմբերի 7-ին՝ տեղական ժամանակով 11 անց 41 րոպե Հայաստանի հյուսիսային շրջաններում տեղի ունեցած ավերիչ երկրաշարժի հետևանքով ավերվեցին մի շարք քաղաքներ և գյուղեր, եղան հազարավոր զոհեր: Էպիկենտրոնը Սպիտակ քաղաքն էր, որտեղ երկրաշարժի ուժգնությունը գնահատվել էր 10 բալ:

Այսօր 1988թ. Սպիտակի աղետալի երկրաշարժի 24-րդ տարելիցն է: Ու ցավով պետք է նշել, որ տարերային աղետի ողբերգական իրադարձություններից 24 տարի անց էլ Հայաստանում դեռ չի վերացել «աղետի գոտի» հասկացությունը, և մեր կառավարություն այս հարցում դեռ շատ անելիքներ ունի, չնայած որ «աղետի գոտի», «Սպիտակի երկրաշարժ» հասկացություններն արդեն վաղուց պետք է անցյալ լինեին:

Երկրաշարժից 24 տարի անց, ըստ պաշտոնական տվյալների, 4500 ընտանիք շարունակում է անօթևան մնալ: