The New York Times-ը կրկին անդրադարձել է սիրիահայերի` Հայաստան վերադառնալու թեմային

Վերսկսել է Սիրիայի հայերի հոսքը Հայաստան. գրում է The New York Times-ը: Պարբերականը հիշեցնում է, որ հարյուր տարի առաջ Հայոց ցեղասպանության ժամանակ Օսմանյան կայսրությունից հայերի նախնիները փախչել են և ապաստան գտել Սիրիայում:

«Հայերը այժմ օգնություն են ցուցաբերում Սիրիայում գտնվող հայրենակիցներին՝ օգնելով նրանց շարունակել գոյությունը: Նրանք նաև օգնում են սիրիահայերին տեղափոխվել Հայաստան՝ ժամանակավորապես կամ ընդմիշտ ապրելու, արագացված կարգով վիզաներ են տրամադրում, ինչպես նաև բնակության թույլտվություն: Մոտ 6000 սիրիահայ այժմ ձգտում է ապաստան գտնել Հայաստանում, քանի որ Հալեպում պայքարը կառավարական զորքերի և ապստամբների միջև դեռ չի դադարում:

Վերջին մի քանի ամիսների ընթացքում Հայաստանից Հալեպ է թռչել սնունդով լի երեք ինքնաթիռ: Օգնությունը բաժանվել էր հայաշատ թաղամասերի բնակիչներին»,-գրում է պարբերականը: The New York Times-ը նշում է, որ սիրիահայերը Սիրիայում աչքի են ընկնում իրենց արծաթյա և ոսկյա ձեռքի աշխատանքներով, ինչպես նաև՝ խոհանոցով: