Պետք է դուրս գանք «Երկիր Նաիրի» վեպի սյուժեից և գանք դեպի «իրական» Հայաստան. Փաշինյան

«Արտաքին և ներքին քաղաքականության հետ կապված բոլոր լուծումները, որ մենք առաջարկում ենք մեր քաղաքացիներին և միջազգային գործընկերներին, հենվում են իրական Հայաստանի հայեցակարգի վրա, և իրականացնում ենք բալանսավորված արտաքին քաղաքականություն»։ Այս մասին այսօր՝ հունվարի 22-ին, կառավարության հարցուպատասխանի ժամանակ ասաց Նիկոլ Փաշինյանը՝ անդրադառնալով ՔՊ–ական պատգամավոր Շիրակ Թորոսյանի դիտարկմանն այն մասին, որ վերջին շրջանում Հայաստանը բալանսավորված հարաբերություններ է ձևավորել տարբեր երկրների հետ։

Շիրակ Թորոսյանի հարցին, թե ի՞նչ կարելի է ակնկալել այդ հարաբերություններից, Նիկոլ Փաշինյանը պատասխանեց.

«Մեր արտաքին գործընկերների հետ հարաբերությունները չեն զարգանում մեկը մյուսի հաշվին, բայց մյուս կողմից դրանք ունեն որոշակի փոխազդեցություններ։ Հայեցակարգային նրբությունն այն է, որ այդ արտաքին հարաբերությունների միջև որոշակի բալանս ձևավորվի, որը կդառնա գործոններից մեկը, որն ապահովում է ՀՀ անվտանգությունը»։

Նրա խոսքով, Հայաստանն այսօր ճիշտ զարգացման ուղին է բռնել։

«Ես կարող եմ ասել հետևյալը, այն գործընթացը, որ մենք անցել ենք, ճամփորդություն է Եղիշե Չարենցի «Երկիր Նաիրի» վեպից դուրս՝ դեպի այսօրվա իրական աշխարհ։ Այն բարեփոխումները, որ մենք իրականացնում ենք,  հենց դրա մասին են։ Մենք առաջարկում ենք, որ բոլորս հաշիվ տանք մեզ, որ ապրել ենք այդ վեպի սյուժեի մեջ և դուրս գանք դրանից դեպի իրական Հայաստան։ Սա և՛ արտաքին, և՛ ներքին քաղաքականության հայեցակարգն է»,–նշեց Փաշինյանը։