Մինչև 300 000 դրամը չի հայտարարագրվում․ Փաշինյան (տեսանյութ)

«Մարդուն պիտի ասենք՝ պետությունը չի մտնում քո գրպանը, պետությունը ասում է՝ դու իմ տերն ես, հիմա եկել եմ դրա ուրիշ այլաբանությամբ: Երբ թոռները մտնում են պապիկի գրպանը, պապը թաթերին չի տալիս, ասի՝ մի մտեք, որովհետև հարազատի հարաբերություն է իրենց մեջ: Հերիք է մենք պետությունը ընկալենք որպես թշնամի»:

Այս մասին այսօր՝ Կառավարության հետ հարցուպատասխանի ժամանակ ասաց վարչապետ Նիկոլ Փաշինյանը՝ արձագանքելով «Քաղաքացիական պայմանագիր» խմբակցության պատգամավոր Հռիփսիմե Գրիգորյանի՝ Եկամուտների ընդհանուր հայտարարագրման ռեֆորմի մասին հարցին:

«Ռելիգտային ընկալումը դա է, որ մենք ասում ենք պետություն, միանգամից պատկերացում ենք այն կայսրությունը, որը մեզ ճզմելա, սպանելա: 15-րդ դարից հետո այդպես է եղել հարաբերությունը: Այս պատկերացումները քաղաքացու մոտ պետության վերաբերյալ պետք է փոխվի: Ասում են պարգևավճար, կոռուպցիա, մարդկանց մոտ ընկալում է ստեղծվել, որ պետական բյուջեն այս դահլիճի այսքան հատվածի համար է ծախսվում: Էլի եմ ասում, ոչ մի ընտանիք ինքը իր համար չի անում այնքան ծախս, ինչքան որ անում է Հայաստանի հանրապետության պետական բյուջեն: Կառավարությունը Հայաստանի ժողովրդին ասել է կարգախոսը, որ Հայաստանը իմ տունն է, ժողովուրդը իմ ընտանիքն է, դա նշանակում է մանկապարտեզներ, դպրոցներ, ճանապարհներ: Դուք որ արհեստավոր եք տանում ձեր տուն, ի՞նչ է կատարվում ձեր շինարարության հետ, անունը դնում եք կոռուպցիոն ռիսկ: Չեք դնում չէ՞, այդ նույն պրոբլեմների հետ բախվում է պետությունը: Մեր բյուջեյում համընդհանուր հայտարարագրման համակարգից եկամուտ նախատեսված չի, զրո է եկամուտը: Թեման բազմաշերտ է»,- ասաց վարչապետը:

Այդ համատեքստում վարչապետն ասել է՝ մարդկանց մեջ նույնիսկ լուր է պտտվել, որ ընտանիքի անդամը մյուսին գումար է փոխանցելու դեպքում էլ հարկվելու է, ինչն այդպես չէ. «Այդպիսի բան չկա, մինչև 300 000 դրամը, ուզում է տարին 800 անգամ փոխանցում կատարի, չի հայտարարագրվում, դրանից ավելին է հայտարարագրվում է, բայց չի հարկվում: Կլինի Հայաստանի ներսից թե դրսից, աշխարհի որ ծայրից էլ որ լինի, դրամով թե դոլարով, չի հարկվում: Այստեղից այլ բան կա, օրինակ ընտանիքներ կան անապահովության նպաստ են ստանում 25000 դրամ կամ 30, մեկ էլ պարզվում է ամիսը ստանում է 3000 դոլար տրանսֆերտ: Այ դա պետք է հարկվի: Մենք նպաստը տալիս ենք այն կանխավարկածով, որ նա հացի փող չունի: Մենք չենք ուզում այդ փողը որևէ մեկի ձեռքից խլել, մենք ուզում ենք դա վերահասցեագրենք այն մարդուն, ով իրոք դրա կարիքը ունի»: