Քննարկումները ամրապնդեցին համոզմունքը, որ ամիսներ շարունակ թմբկահարվող ԵՄ-ին ՀՀ անդամակցության թեման ընդամենն աղմուկ է ոչնչի մասին. Արման Գալոյան

Լրագրող Արման Գալոյանն իր ֆեյսբուքյան էջում գրել է.

«ԱԺ հանձնաժողովում ԵՄ-ին ՀՀ անդամակցության գործընթացի մեկնարկի մասին օրենքի նախագծի քննարկումները միայն ամրապնդեցին այն համոզմունքը, որ ամիսներ շարունակ թմբկահարվող այս թեման ընդամենը աղմուկ է ոչնչի մասին։ 
Բացարձակ ոչնչի մասին։

Այս նախագիծը, իր էությամբ, պարզապես ցանկությունների ու իղձերի մասին հռչակագիր է։ Եւ ոչինչ ավելին։ 

Ինքը՝ նախաձեռնության ներկայացուցիչ Արտակ Զեյնալյանը, քննարկումների ընթացքում մի քանի անգամ շեշտեց, որ սա ընդամենը գործընթացի մեկնարկի ցանկությունների մասին է։ 
ՈՒշադրություն դարձրեք՝ ցանկությունների, որոնց իրականացման ճանապարհները, սակայն, անհասկանալի են։ 

Մի կողմից Հայաստանը ԵԱՏՄ անդամ է, հետեւաբար՝ ԵՄ-ի անդամ դառնալը հակասում է դրան։ Բայց եթե անգամ ինչ-որ մեկի երեւակայությունը հերիքի պնդել, որ պետք է արագ դուրս գանք ԵԱՏՄ-ից ու մտնենք ԵՄ, ապա հարց՝ իսկ ԵՄ-ն պատրա՞ստ է Հայաստանին ընդունել։ Իհարկե, ոչ։ Ոչ որքան էլ այն թվա դրախտային հովիտ.....որտեղ, պարզվում է, քեզ ոչ ոք չի սպասում։ Բացարձակապես ոչ ոք։

Ուստի, եւս մեկ անգամ արձանագրենք՝ այս նախագիծն իրականության հետ որեւէ առնչություն չունի։ Այն առնչություն չունի նաեւ Հայաստանի իրական խնդիրների հետ։

Իսկ թե ինչո՞ւ է արվում….պարզ, շատ պարզ պատճառով՝ քարոզչական աղմուկի համար։ Սա անգամ ՌԴ-ին ուղղված շանտաժ չի, որովհետեւ այնքան անիրականանալի ու մեռելածին նախաձեռնություն է, որ….

Իսկ աղմուկի միակ նպատակը հասարակության ուշադրությունը շեղելն է, կեղծ ակնկալիքներ գեներացնելը։ Բայց նաեւ՝ առաջիկա ԱԺ ընտրություններին ընդառաջ, թեման շահարկելով ընդամենը քաղաքական հայտ ներկայացնել Է, նոր քաղաքական բեւեռ ձեւավորելու մտադրություն։ Ընդ որում, ակնհայտ է, որ իշխանությունը շահագրգռված է այս գործընթացով՝ այդ «նոր բևեռի» ձևավորմանը նպաստելու և այն իր համար հարմար ընդդիմություն կամ միգուցե կոալիցիոն գործընկեր դարձնելու նպատակով»: