«ՉԻ». Սերժ Սարգսյանն ու Գագիկ Ծառուկյանը՝ Սեյրան Սարոյանի որդու հարսանիքին

12.12.12-ին բազմաթիվ հարսանիքներ են տեղի ունեցել ոչ միայն աշխարհում, այլև Հայաստանում: Հայաստանցիների պարագայում հարսանիքների առատությունը հենց այդ օրը, թերևս, պայմանավորված էր կրկնվող «գոլդ» թվերով, ինչը վերստին կկրկնվի միայն 100 տարի հետո: 

12.12.12-ին Հայաստանում կայացած ամենաուշագրավ հարսանիքը, թերևս, գեներալ, ԱԺ ՀՀԿ-ական պատգամավոր Սեյրան Սարոյանի որդու հարսանիքը կարելի է համարել:  Նկատենք, որ երկու ամիս առաջ Սարոյանն ամուսնացրեց իր տղաներից մեկին. հարսանեկան արարողությանը մասնակցում էին հանրապետության բոլոր բարձրաստիճան պաշտոնյաները, այդ թվում՝ Սերժ Սարգսյանն ու Գագիկ Ծառուկյանը: Հենց այդ հարսանիքի ժամանակ էր, որ ներկաները ֆիքսել էին, թե ինչպես է Գագիկ Ծառուկյանը խմում Սերժ Սարգսյանի կենացը, և ճիշտ հակառակը:

Դեկտեմբերի 12-ին «Օջախ» ռեստորանային համալիրում կայացել է Սեյրան Սարոյանի մյուս որդու հարսանիքը, որին վերստին մասնակցել են հանրապետության  բարձրաստիճան պաշտոնյաները: Սերժ Սարգսյանը դարձյալ ներկա է եղել, և նա ահագին բարձր տրամադրությամբ՝ երգով-պարով, մասնակցել է գեներալի որդու հարսանիքին: Ի տարբերություն Սարգսյանի՝ Գագիկ Ծառուկյանը չի մասնակցել հարսանիքին, և սա այն պարագայում, որ գեներալի և Ծառուկյանի միջև գործում է քավոր-սանիկական կապը: