Չեխիայի նախագահը Ուկրաինան «փրկելու» միջոց է մտածել

Չեխիայի նախագահ Պետր Պավելը Մյունխենի անվտանգության գագաթնաժողովում հայտարարել է, որ միջազգային հանրությունը պետք է Ուկրաինայի համար մշակի Մարշալի պլանի անալոգը, որը հետպատերազմյան Եվրոպային արտաքին օգնություն տրամադրելու ԱՄՆ ծրագիրն է, հաղորդում է Gazeta.ru–ն։

Մարշալի պլանը Երկրորդ համաշխարհային պատերազմից հետո Եվրոպային օգնելու միջոցառումների մի շարք էր: Այն անվանվել է ի պատիվ պետքարտուղար Ջորջ Մարշալի, ով առաջարկել է ծրագիրը 1947 թվականին։ Ծրագրի շրջանակներում պատերազմի ընթացքում ավերված եվրոպական 16 պետություններին տրվել է ընդհանուր 13,3 միլիարդ դոլար (այսօրվա փոխարժեքով մոտավորապես 150 միլիարդ դոլարին համարժեք գումար):

Պավելը հավելել է, որ Ուկրաինային պետք է երաշխավորել «աստիճանական» անդամակցությունը Եվրամիությանը։ Նա կարծում է, որ իր առաջարկած միջոցները կօգնեն երկրին կյանքի ավելի բարձր որակի հասնել, քան Ռուսաստանում։