«Տաշիր» ընկերությունը Ռուսաստանում կներկայացնի Yamamay ներքնազգեստի ցանցը

СК-трейдинг–ը` հայազգի գործարար Սամվել Կարապետյանին պատկանող «Տաշիր» ընկերության դուստր ընկերությունը, գալիք տարի Մոսկվայում և Ռուսաստանի այլ շրջաններում կբացի իտալական Yamamay ներքնազգեստի ապրանքանիշի առնվազն 10 խանութ. այս մասին գրում է РБК daily-ն:

Տնային հագուստի և ներքնազգեստի Yamamay ապրանքանիշը ստեղծվել է 2001 թվականին և պատկանում է Pianoforte Holding ընտանեկան հոլդինգին, որը ներառում է նաև հագուստի և աքսեսուարների Caprisa խանութների ցանցը և Jaked վերնահագուստի խանութները: Ինչպես պարզաբանել է «Տաշիր» ընկերության փոխնախագահ Իգոր Բուլիտովը, այժմ ընկերությունը պայմանավորվում է ապրանքանիշի սեփականատերերի հետ պաշտոնական ներկայացուցչի իրավունքի ձեռքբերման շուրջ: Ընդհանուր առմամբ ընկերությունը ծրագրում է 2013 թվականին բացել 50 մուլտիբրենդային խանութ ինչպես սեփական առևտրի կենտրոններում, այնպես էլ այլ տարածքներում: