Ռուսաստանցի բնապահպան Սուրեն Գազարյանը լքել է Ռուսաստանի Դաշնությունը

Ռուսաստանցի բնապահպան, ազգությամբ հայ Սուրեն Գազարյանը, ով նախկինում բարձրաձայնել էր այն մասին, որ իր նկատմամբ դաշնային  հետախուզություն է հայտարարվել, լքել է Ռուսաստանը. հայտնում է Մարդու իրավունքների պաշտպանության միջազգային կազմակերպությունը՝ Human Rights Watch-ը(HRW).

Կազմակերպության կայքում ասված է, որ դեկտեմբերի 19-ին Գազարյանն ինքն է այդ մասին հայտնել Human Rights Watch-ին: Human Rights Watch-ից տեղեկացնում են, որ բնապահպանը փորձում է քաղաքական ապաստան ստանալ եվրոպական երկրներից մեկում:

Դեկտեմբերի 15-ին պայմանական դատապարտված Սուրեն Գազարյանն իր Twitter-յան բլոգում գրել է, որ իր նկամամբ դաշնային հետախուզություն է հայտարարվել: Գազարյանի նկատմամբ քրեական գործ է հարուցվել սպանության սպառնալիքի համար:

Բնապահպանն իր մեղքը չի ընդունում: Նրա խոսքերով՝ օգոստոսի 2-ին Գելենջիկի շրջանում նա կոնֆլիկտ է ունեցել մասնավոր սեփականության պահակներից մեկի հետ, որից հետո պահակներից մեկը նրա դեմ բողոք է ներկայացրել ոստիկանություն:

Ավելի վաղ Գազարյանը 3 տարով պայմանական ազատազրկվել էր: Հետաքննության տվյալներով՝ 2011թ. նա և մեկ այլ բնապահպան՝ Եվգենի Վիտիշկոն, Կրասնոդարի երկրամասի անտառում կանգնեցված ցանկապատի վրա վիրավորական բնույթի գրառումներ էին կատարել: Բնապահպաններն իրենց հերթին պնդում են, որ գրառումները կատարվել են Կուբանի ղեկավար Ալեքսանդր Տկաչևի ամառանոցի դարպասներին, քանի որ վերջինս ապօրինի կերպով յուրացրել էր անտառի հատվածը և կտրել ծառեր, որոնք գրանցված էին Կարմիր գրքում: