ԵԽ պատգամավորներն ընդգծել են Ադրբեջանում գտնվող հայ ռազմագերիների և տեղահանված արցախահայերի հարցը լուծելու անհրաժեշտությունը

Եվրախորհրդարանի պատգամավորների համատեղ հայտարարություն են տարածել՝ ողջունելով «2025 թվականի օգոստոսի 8-ին Վաշինգտոնում կայացած առաջնորդների հանդիպման արդյունքներով Հայաստանի և Ադրբեջանի միջև հարաբերությունների կարգավորման գործընթացում գրանցված նշանակալի առաջընթացը»։

Ըստ հայտարարության՝ ՀՀ և Ադրբեջանի միջև ստորագրված հռչակագիրը սահմանում է երկարատև խաղաղության հասնելու հետագա քայլերը։

«Մենք բարձր ենք գնահատում Հայաստանի և Ադրբեջանի կառավարությունների վճռականությունը՝ դադարեցնելու երկարատև հակամարտությունը, ինչպես նաև Միացյալ Նահանգների նշանակալի ներդրումը այս դրական արդյունքի մեջ՝ հիմնվելով վերջին տարիների բանակցությունների վրա, այդ թվում՝ ԵՄ միջնորդությամբ։ Կարևոր է, որ այս գործընթացը շարունակվի նախաստորագրված Խաղաղության պայմանագրի շուտափույթ ստորագրմամբ և վավերացմամբ։

Երկու երկրների միջև ներքին, երկկողմ և միջազգային փոխադրումների համար հաղորդակցությունները բացելու քաղաքական համաձայնագիրը, որը հիմնված է յուրաքանչյուր պետության ինքնիշխանության, տարածքային ամբողջականության և իրավասության նկատմամբ հարգանքի վրա, ինչպես հայտարարվել է առաջնորդների համատեղ հռչակագրում, կարևոր առաջընթաց է»,– նշված է հաղորդդագրության մեջ։

Հայտարարության մեջ ընդգծվել է փոխադարձ օգուտի կարևորությունը Հայաստանի Հանրապետության համար՝ առաջնորդների կողմից համաձայնեցված միջազգային և ներքին հաղորդակցությունների առումով․ «Այս կարևորագույն նախագծի իրականացումը կբացահայտի Հարավային Կովկասի հսկայական ներուժը և կդառնա առևտրի և տնտեսական բարգավաճման կենտրոն՝ ի շահ տարածաշրջանի բոլոր երկրների»։

«Թուրքիայի կառուցողական ներգրավվածությունը կարևորագույն նշանակություն կունենա այս առաջընթացի լիարժեք իրականացման համար: Մենք կոչ ենք անում Թուրքիայի կառավարությանը աջակցել այս դրական զարգացումներին՝ փոխադարձաբար պատասխանելով Հայաստանի պատրաստակամությանը՝ կարգավորելու հարաբերությունները և բացելու հայ-թուրքական սահմանը՝ ի շահ երկու երկրների և նրանց սահմաններից դուրս:

Մենք նաև ողջունում ենք առաջնորդների անվերապահ հավատարմությունը ՄԱԿ-ի կանոնադրությանը և 1991 թվականի Ալմաթիի հռչակագրին, ինչպես նաև միջազգային սահմանների անձեռնմխելիության և տարածք ձեռք բերելու համար ուժի կիրառման անթույլատրելիության սկզբունքներին։

Մենք վստահ ենք, որ սա կհանգեցնի սահմանների սահմանազատման գործընթացում հետագա առաջընթացի և ադրբեջանական զորքերի՝ Հայաստանի Հանրապետության տարածքից լիակատար դուրսբերման մոտ ապագայում։ Մենք նաև ընդգծում ենք Ադրբեջանում գտնվող հայ ռազմագերիների և տեղահանված ղարաբաղցի հայերի հետ կապված չլուծված հարցերի լուծման անհրաժեշտությունը»,– ասված է հաղորդագրության մեջ։

Նշվում է, որ ԵՄ–ն պատրաստ է հետագայում նպաստել կարգավորման գործընթացին․ «Այս գործընթացը կարևոր է նաև Հայաստանի տնտեսական և պաշտպանական հարաբերությունները դիվերսիֆիկացնելու ջանքերի, ինչպես նաև հայտարարված եվրոպական ձգտումների համատեքստում, որոնց Եվրախորհրդարանը լիովին աջակցում է»։

▪️Արտաքին գործերի հանձնաժողովի (AFET) նախագահ Դեյվիդ ՄաքԱլիստեր
▪️Եվրանեսթ ԽՎ պատվիրակության նախագահ Սերգեյ Լագոդինսկի
▪️Հարավային Կովկասի հետ հարաբերությունների գործով պատվիրակության նախագահ Նիլ Ուշակով
▪️AFET-ի Հայաստանի հարցերով մշտական զեկուցող Միրիամ Լեքսման
▪️AFET-ի Ադրբեջանի հարցերով մշտական զեկուցող Դեն Բարնա